Shillong, Nohprah 18: Kawei ka ïing kaba la shu shna malu mala da ka lytang snep bad ka tin kaba don hajrong jong ka Meghalaya Rural Bank, Lum Shatsngi, Kenches Trace, ka la shah bam duh ha ka ding kaba la klang bha mynta ka Lah Sngi U Blei.
Haba ïakren bad ki bor pynïaid shnong ki la ïathuh, ba kane ka jingjia ka la jia ha ka por kumba 11 baje bad ka dei kaba la longtrai da u Munna Ahmed bad la suba jur ba ka jingsdang jong ka jingpluh ka dei namar ka jingklet ban pynlip ïa ka Gas.
Ki la iathuh, ba ïa kane ka ïing sah ka dei kaba la shu shna malu mala ban sah shipor bun ngut ki nongbylla sngi kiba wan ban trei bylla ha kane ka jylla bad ha katei ka ka jingjia ym shym la don ba mynsaw.
Ki pulit pynlip ding ki la wan poi mardor bad ki la ïoh ban tem noh ïa kane ka ding shwa ba kan pur sha ki bynta jong katei ka ïing building kaba don ïa ka Bank bad ka jinglah ban poi kloi ki kali pynlip ding ka dei ruh ba ka surok ha kane ka shnong ka kylluid bha namar ka jingduna ban ïaid ki kali ba ka dang don ka jingpynkhuid shnong ha Lum Shatsngi.
Halor kane ka jingjia, na ka liang u MLA ka South Shillong Constituency u Bah Sanbor Shullai ryngkat bad ki nongïalam shnong ki la leit ban jngoh ïa kane ka jaka kaba la shah bam duh ha ka ding.
Ki bor pyniaid shnong kiba la leit ban jurip ïa kane ka jaka, ki la kyndit ban ïohi ba kane ka jaka kaba la pluh ka dei kaba la shna kyrpang ban buhai shnong da ki nongbylla kiba wan na ki jylla bapher bapher.
