Nongstoiñ, Jymmang 25: Ïa ka training ba 12 sngi lynter na ka bynta ki volunteer shnong kaba hap hapoh ka APPDA Mitra Scheme jong ka National Disaster Management Authority (NDMA), la plie myn ha ka sngi nyngkong jong ka taiew kata ka 23 tarik ha ka shnong Kynshi Bangla da u Bah H.K Thabah MCS ADC bad CEO DDMA West Khasi Hills District, Nongstoiñ, ba la pynlong da ka District Disaster Management Authority Nongstoiñ, ha ryngkat ka jingïasnohkti lang bad ka Meghalaya State Disaster Management Authority (MSDMA).
Ha katei ka sngi plie la wan ban ïa don ryngkat lang da u bah P.Marbaniang (Retd) Deputy Director DIPR, Deputy Controller Civil Defence & Home Guards bah W Nonglang, bah J.Mawthoh DDMO, DDMA, Nongstoiñ bad bah A Syiemlieh Sordar Kynshi Bangla.
Haba ai jingkren u bah H.K Thabah u la ong ba ka Jylla Meghalaya ka ïakynduh ïa shibun ki jinglyngshop ka mariang kum u jumai, ka jingtwa ka khyndew, ka jingshlei um bad kiwei kiwei. Kumta ki nongïalam shnong ki volunteer shnong ki dei kiba nyngkong eh ban don ka jingkitkhlieh haba ïa kynduh ïa kine ki bor lynshop ka mariang, kumta ka jingai training ïa ki ka long kaba donkam ban pynduna ïa ki jingma.
U la ong ruh ba lada ki volunteer shnong ki la dep pyntbit ïalade bad kloi ban ai jingïarap wut wut ha ka por kaba biang hadien ba la jia ka jinglyngshop ki la lah ban ai jingïada ïa shibun ki mynsiem briew. Haba wan jia ki jinglynshop jong ka mariang ym dei tang kawei ka department, ka ministry ne ki agency ki ban ai jingïarap, hynrei ka dei ka kamram jong baroh ki nongshong shnong, u la bynrap. U la kyntu ïa ki ban sa ïoh ïa ka training, ba ka kamram kam dei tang ban ai jingïarap, hynrei ban pyphriang lang ïa ki jingnang jingtip lyngba ki jingpynshai paidbah.
Kane ka training programme ba12 sngi kata naduh ka 23 tarik haduh ka 7 tarik u bnai Jylliew 2022, kan ai jinghikai ïa ki 100 ngut ki volunteer jong ki shnong ki ban sa phiah ha ki bynta bapher bapher jong ka Programme. Ki Resource persons na DDMA, MATI, Civil Defence & Home Guards, State Search and rescue team, Fire & Emergency Services, Shillong, District Medical Team bad kiwei kiwei, kin sa ai jinghikai ïa shibun kiei kiei ha kaba ïadei bad ki lad ai jingïarap lada wan lynshop ki bor mariang.
