Shillong, Ïaïong 04: Baroh shi katta ki paidbah ki ud bad ki khñium ïa ka jingsma ka Marten, kaba haduh mynta ym pat i don dak eiei ban pynkynriah noh shawei. Hynrei mynta la mih sa kawei pat ka jingma na kane ka jaka theh ñiut jong ka nongbah Shillong bad kane ka jingma ka long na ki jaboh jabaiñ kiba la bret na ki Hospital. Katkum ka jingïathuh ki nongïalam jong ka Seng National Hynñiewtrep People Federation (NHPF) la ong ba ki jaboh jabaiñ lane kita ki Bio Medical Waste la leit bret ha Marten ban pynkhuid ne thang ha ka Incinerator lane ka kor ban thang ïa ki jaboh jabaiñ. Tangba kane ka kor kaba la buh ha Marten kadei kaba ym shym la ïoh jingbit na ki bor shnong ba marjan bad ka Marten lane na ka Mawlai Town Dorbar lane ym shym la pynlong ïa kano kano ka Public Hearing shuwa ban buh ïa kane ka jaka thang jaboh.
U General Secretary ka Seng, u Samla Youberlin L. Sangriang, haba ïakren bad ki nongthoh khubor ha Shillong Press Club mynta ka sngi, u la ïathuh ba ka Seng ka la pan da ka RTI na ka ophis jong ka SMB bad la lap ba kane ïa kane ka Incinerator la buh khlem da ïoh jingbit na ki bor shnong. U la ong ba kane ka jingbuh kumto khlem da ïoh jingbit ne khlem da pynlong ïa ki Public Hearing ka long ka jingma ïa ki paidbah kiba sah marjan bad ka Marten, namar ba kane ka jaka bret jaboh wat tang ïa ki ñiut ki ñer kiba wan na ki ïew ki jat, ki shnong ki thaw ruh kam pat lah ban pynkhuid bha, ka la buh sa kane ka jaka thang ïa ki jaboh jabaiñ na ki Hospital bad kane ka long ka jingma kaba khraw ïa ka jingkoit jingkhiah jong ki paidbah. U la ïathuh ruh ba kawei na ki Hospital kiba heh eh ha ka jylla, ka NEIGRIHMS ruh ka bret ïa ki jabioh jong ka ha kane ka Marten da kaba siew bnai pat sha ka Hospital.
U Samla, Damien Passah,, u la ïathuh ba katkum ka Maual Book jong ka snem 2016 ha kaba ïadei bad ka jingpynkhuid ne thang ïa ki jaboh na ki Hospital dei ban da leh phikir bad bud bha ïa ki kyndon, ym lah ban shu thang ne pynkhuid kumba leh ïa ki ñiut ki ner ne ki jaboh na ki jaka ïew. “Katkum ka Manual Book donkam ban thang hapoh 24 kynta hadien ba la bret na ki Hospital, namar kidei ki jaboh kiba kit ïa ki jingpang bad donkam ruh ban tip naduh ka rukom kitm ka rukom tap ïa kine ki jaboh”, u la ong.
U la ïathuh ba ka NEIGRIHMS kam lah ban ai jubab kumno la kit ïa ki jaboh na Hospital sha Marten. Nangta katno kilo shi sngi la kit bad katno ka shimpor ban thang ne pynkhuid. U la ïathuh ruh ba ha ka por ba ka Seng ka leit jurip ïa kane ka Incinerator la lap ba u nongtrei u shim shuti bad ym tip la don ne em da kiwei pat ki nongtrei, khnang ban tip ki thang ne em hapoh ka 24 kynta ba wanrah. Nangta u la ïathuh shuh shuh ba dei ban don ki record ne ki jingthoh kiba thik ba thik ïa ka rukom pynkhuid bad ka rukom kit bad rukom tap ruh.
Nalor ka NEIGRIHMS, ki nongïalam ka NHPF ki la ïathuh ruh ba kiwei kiwei de ki Hospital, ki Clinic ki pynlong ïa ka Marten kum ka jaka bret ïa ki jabih jabaiñ na ki jaka sumar jong ki.
“Kane ka jingbymshai ka rukom batai bad ka rukom buh jingthoh ka buh ïa ki paidbah ha ka jingma kaba khraw kaba lah ban ktah wat ïa ka koit ka khiah ki paidbah, nalor ba ki jaboh jabaiñ kiba bun ki tuid beit sha Pung Umïam”, la ong u Samla Damien.
