Shillong, ïaïong 04: Ka Shillong Press Club ha ka jingïalang kaba la long mynta ka sngi, ka la pynpaw ka jingsngewlem halor ka jingkhlad noh u Bah Khraw Kharkongor, Nongthoh khubor jong u PCN, Media Plus bad Reporter ba mynshuwa jong u Peitngor.
U Bah Khraw uba shong ba sah ha Nongkseh, Upper Shillong u la khlad noh hynnin ka sngi hadien ka jingshitom kaba la ban ïa u katto katne bnai. U la iehnoh shadien ïa i kurim bad ki khun.
Ha kane ka jingïalang ki dkhot ka SPC ki la pynkynmaw ïa ka jingnoh synñiang jong u Bah Khraw ha ka kam thoh khubor bad kiwei kiwei de ki kam. Ha kane ka jingïalang la pynlong ruh ka jingsngap jar kaba shi minit kum ka dak ka jingkynmaw burom ïa une u Paralok Nongthoh khubor.
Ka Shillong Press Club ka pynpaw ka jingsngew kyndit bad ka jingsngewsih kthang halor ka jingkhlad noh i Bah Khraw Kharkongor, u Paralok ba la ju iatreilang ha ka kam thoh khubor la bun snem. Ha ka jingshem jong ngi, ngi lap ba i Bah Khraw u long u briew uba trei shitom bad uba minot ia ka kam. U long u briew u ba duna ki kyntien, hynrei uba bun pat ka kam. Ka jingkhlad noh jong i, ka long ka jingduh ym tang ia ka ïing ka sem, hynrei ia baroh ki Paralok Nongthoh Khubor
Ka khubor sngewlem na ka ong, “Ka Shillong Press Club ka la pynlong ka jingïalang sngewlem ha ka 4 tarik u Ìaiong 2023 bad pynlong ruh ka jingsngap jar kaba shi minit kum ka jingburom ia ka mynsiem kaba la khlad noh
Ngi duwai ba U Blei Un don ryngkat bad pyntngen ia phi ka ïing ka sem baroh kawei ha kum kane ka por ba u lyoh ba dum u wan kah iaphi kum ka ïing ka sem”.
