Shillong, Kyllalyngkot 15: Ka kynhun ïalehkai jong ka Meghalaya ka la ïoh ban sdang tyngeh ban pynskhem ïa ka jingkyrmen ban khur jingjop ha ka jingïalehkai kaba long pyrshah ïa ka Manipur ha ka sngi ïakhun ba ar jong ka U-23 men’s Col CK Nayudu Trophy ha Surat, hadien ba ka la lah ban seisoh bha ha baroh, ka tied bad ruh ha ka bol.
Ka jylla Manipur ka la ïoh ban jied tied nyngkong hadien ba jop ïa ka toss hynnin ka Sngi hynrei ka la shah pynhap noh tang hadien ba kynjoh sha ka 257 ron na ki 121.5 over.
Napdeng ki rangkawangbol, dei u Manish Sharma u ba la lah ban trei shitom na bynta ka Meghalaya, da kaba khur haduh 6/50 naki 36 over. Kane ka lah ban long ruh ka lympung kaba seisoh tam na bynta jong u, ryngkat bad ki 14 wicket kiba u la khur ha ka sngi ïakhun ba nyngkong pyrshah ïa ka Sikkim.
Haba shim ïa ka pali tied, ka Meghalaya ka la ïoh ban kamai 230/4 naki 59 over, bad ka dang sahdien da 27 ron. Lai ngut ki rangtied ka kynhun ki la lah ban kamai mar shiteng ïa ka spah ron – kine ki kynthup ïa u Nishanta Chakraborty (66 naki 62 bol), u Aman Kumar (65 naki 141) bad u kapten ka kynhun, u Kevin Christopher (57 not out naki 90 bol).
U Nishanta, u ba la khyrwit haduh 11 tylli ki four bad kawei ka six, bad u Aman ki la lah ban kyntiew 91 ron shuwa ban hap u wicket ba ar. U Kevin un hap ban pyrkhat ban buh shakhmat ïa ka kynhun mynta ka sngi shuwa ban pyrkhat kynjoh sha ka spah ron. Ma u lem bad u Joydeepan Deb 27 naki 53 bol kin bteng bïang mynta ka sngi ïa ka Inning.
Shuwa kane, ka Manipur ka la lah ban pynneh slem ïa ka inning tied ba nyngkong kaba la bteng ar sngi lynter da kaba kamai tang 2 ron man kawei ka over. U rangtied ba mih nyngkong na katei ka kynhun, u Champion u la ïoh ban tied palat ïa ka spah (102 naki 329 bol) u ba la tied marwei haduh 103.5 over. U Suresh Singh u la lah ban kamai 39 ron hynrei hadien ba u Manish u la pyndkut ïa ki, ka Manipur ka la sdang ban hap ki wicket kaba la pynlong ïa ka ban sahkut 134/6.
Dei hadien kane ba u Kiran Laishram (65 not out naki 193) u la lah ban kyntiew ron ryngkat bad u Champion da 93 ron shuwa ban hap u wicket ba hynñiew, kaba la pynïoh ïa ka Manipur ban kynjoh sha katei ka ron.
