Don jingkyrmen ban ïaid beit noh ka jingtrei surok Shillong- Pynursla, pyntip ka PWD sha Court

Shillong, Naitung 31: Ka jingpyntrei ïa ka Surok na Shillong shaduh Dawki, kaba la ïakynduh bun ki dieng pyngkiang hadien katto katne por ba la sdang pyntrei ïa ka, mynta ka la dang lait ki sohkyrdot bad ka jingtrei mynta i kumba kan ïaid beit shaphrang, khlem da don bun shuh ki jyrwit jyrwat.
Ka daw ka long ba mynta ka sngi sorkar jylla lyngba u Joint Secretary ka Public Work Department (Road and Buliding) ka la pyntip ba ka jingpyntrei ïa ka surok Shillong Dawki ba la bei tyngka da ka JICA kaba dei ka kompeni na Japan kan sa sdang noh shen hadien ba ki jyrwit jyrwat ha kaba ïadei bad ka jingshim ia ka khyndew la lah ban weng.
Haba shim bishar ïa ka mokotduma PIL ba la ujor da u Kaustav Paul ka Kashari ki arngut ki nongbishar ba kynthup ïa u Chief Justice Sanjib Banarjee bad u Justice W Diengdoh, ka Kashari ka la pyntip ba na ka liang ka tnat PWD ka la aiti sha ka Kashari ïa ka kaiphot ha kaba ïadei bad kane ka surok.
Ka Kashari ka la pynpaw ba kumba long mynta ka don jingkyrmen ban ïohi ba ki jyrwit jyrwat la lah ban weng na bynta ban pyntrei noh ïa kane ka surok kaba ka NHIDCL ka la phiah ruh ha ki san lyngkot ne package bad ka la ong ruh ba kumba ka paw hi la lah ban aiti sha ki kontrak ban ïoh pyntrei noh.
Shuh shuh ha ka hukum ka Kashari ka kdew ba ka flyover kaba dei ha ka package ba nyngkong ne first package kaba la mut ban tei na Jhalupara la ïoh jingmynjur na ka sorkar jylla ha kaba ïadei bad ka jingpynkylla thymmai ïa ki katto katne ki bynta. Shuh shuh ka Kashari ka ong ba wat ka Indian Institute of Geomagnetism, kaba la ïeng skhem triang ban ym ailad ban ïaid ka surok lyngba ki jaka ba ka long trai hynrei mynta ka kynti ka pynpaw ïa ka jinglong ba la kloi ban ai jaka da kaba kan kynriah noh kham sharud lada dei ba ka NHIDCL ka kloi ban bei tyngka ban kynriah na kane ka jaka ba ka don mynta.
Ha kaba ïadei bad ka second package, ka kaiphot ba ka sorkar ka la aiti la kdew ba ki trai jaka kiba la rai bna ym ai jaka ban tih surok ruh ki don arngut kiba la rai ban ai mynta, bad ka Kashari ka la kdew nalor kine don sa kawei pat ka trai jaka bym pat shym la wan shim ia ka bai lutksan na ka sorkar bad na ka liang ka Kashari ka pynpaw ba ka Deputy Commissioner jong ka East Khasi Hills kan pynthikna ba kane ka trai jaka kan wan shim noh ïa ka bai lutksan khnang ba kan ym long maw jynthud ha ka jingpyntrei ïa kane ka surok.
Haba ïadei bad ka third package, ne ka Pynursla bypass ka Sorkar ka la pyntip ba ka la dep ban rai ïa ki jaka ba kane ka surok kan iaid  bad ka sorkar kan sa phah ïa kane sha ka NHIDCL bad ki tnat sorkar India ban ïoh jingmynjur. Ka Kashari ka la ong ruh ba ka ki kam kiba sah ha kaba ïadei ban tih ia kane ka surok kata naduh ka Jingshim ïa ka khyndew ne acquisition of land, ka forest clearance bad kiwei kiwei yn leh tad ynda la ïoh ia ka final approval.
Ka Kashari ka kdew ba  kane ka bynta ka dei kaba la sah teng la kham slem bad ka kdew ruh ba ka sorkar ka pyni ba ka don ka agreement ha kaba ïadei bad kane bad ka Kashari ka ong ba tang shu ïoh ia ka approval na ka NHIDCL bad ka Ministry, lada donkam ka sorkar ka lah ban pyntreikam ne invoke ia ki kyndon ka Land compensation na bynta ban ïoh ia ka jaka ban ïaid ka surok.
Haba ïadei bad ka fourth package na ka liang ka Sorkar jylla bad ruh ka NHIDCL ka pynpaw ba ym lah shuh ban pynkynriah wat lada ka mih ka jingdawa na ki nongshong shnong ka Mawshun bad kiwei. Ka Kashari ka ong ba kaba donkam na bynta kane ka dei ba ka Sorkar kan ïapynbeit khnang ban ïoh ia ki jaka ban dup ïoh sdang pyntrei noh ia ka surok namar kumba long mynta la hap ban sahngeh noh namar ym lah ban ïaid shakhamat. Ka Kashari ka ong ba ka khmih lynti ba kane ka package yn lah ban pynsted noh.
Haba ïadei bad ka package ba saw ka Kashari ka pynpaw ba ka kam ka dei ban ïaid noh shakhmat bad ba ka sorkar ka dei ban pynsted noh ïa kane ka kam.
Shuh shuh haba ïadei bad ka package ba san ka Kashari ka bthah ba ka Deputy  Commissioner ka East Khasi Hills ka dei ban pynsted ban ïoh jaka ha ki bynta ka  Wahkdait, Mawriang bad Umsyiem na bynta ban tih ïa kane ka surok.
Shuh shuh ka sorkar ka la pyntip ba ka tarik ba ki kontrak bad ki kompeni ki lah ban thep tender na bynta ban ïoh pyntrei ïa kane ka surok ka dei ha ka  2 tarik Nailar 2023.
Haba ïadei bad ka jingpynkyllem ïa ki dieng na bynta ban ïoh shna ïa ka flyove, ka kashari ka la hukum ba ka jingpynkyllem ïa ki dieng kam dei ban bteng tad haduh ba la sdang ban pyntrei ia kane ka surok.
Na ka liang ka Kashari ka pynpaw ba ka khmih lynti ba ka jingpyntrei ïa kane ka surok kan sdang noh hi shen namar kan long ka jingmyntoi ia ki nongleit nongwan bad ruh kan pynkylluid ïa ka bynta ban rung sha sor na Cantonment area.