Shillong, Risaw 07 : U Myntri ka tnad Pule Puthi ka sorkar jylla, Bah Lahkmen Rymbui ha ka sngi Thohdieng u la pynshai ba ki don bun ki daw ba slem ban weng kam ïa ki nonghikai kontrak ha Dadenggre Sub Division bad kaba kongsan eh ka long ba ïa ka eksamin MTET la pynsangeh shwa ha katei ka sub division hadien ba la lap ba ki lait tuh ki jingkylli.
Namar ba ym pat ïoh ban pynlong ïa ka eksamin MTET ba wan noh ka election MDC, By Election, bud sa ka khlam COVID-19 nangta sa ka Roster System na ka High Court kumta la shu sahteng ban pynlong ïa ka eksamin bad kumta ba ym pat ïoh lad ban thung nonghikai ba ym pat dep ki interview bad la hap ban pynneh shwa da kine kiba don mynta.
Shuh shuh u Myntri u la ïathuh ba ha u snem 2019 ha ka por ba don ka eksam jong ka Meghalaya Teachers Eligibility Test (MTET) ha baroh kawei ka jylla kynthup ha Dadenggre la lap ba don ka jinglait tuh ki jingkylli. “Haba ngi lap ba don ka jinglait tuh jong ki jingkylli tang ha Dadenggre Sub Division kumta ha kiwei ki jaka ïa ka eksam bad ïa ka result la dep ban pynlong bad pynbna katba ha katei ka jaka pat la pynsangeh shwa,” bynrap biang u Myntri.
Shuh shuh u la ïathuh ruh ba hadien ba ïa ka eksam MTET ha Dadenggre la pynsangeh ka Department ka la thmu ban pynmih noh ïa ki khubor laitkam hynrei ha katei ka por wan noh ka elekshon District Council ha kaba la pynbna ïa ka model code of conduct.
Shuh shuh u la kdew ba hadien katei ka elekshon MDC la pynkhreh biang ïa ka jingthung kam ha Dadenggre hynrei ha katei ka por ka la don noh sa ka elekshon shiteng samoi bad kumta ka sorkar ka la pynbna hadien katei.
“Hadien mih sa ka hukum na ka High Court ban pyntreikam ïa ka Roster System,” bynrap shuh u Myntri.
Lah ban kdew hangne ba dang shen ki la mih ki jingkynnoh ba ki 149 ngut ki nonghikai kontrak ha Dadenggre Sub Division ki khlem pat shah weng satia na ka kam kumba long lem kiwei ki nonghikai kontrak ha kiwei ki jaka. Kumta ki daw ki dei kitei kiba la kdew haneng balei ba ym pat lah ban weng namar kin dang hap ban ïai bteng shwa ban hikai tad haduh ban da dep pynlong ïa ka MTET bad thungkam ha ki skul bapher bapher hapoh katei ka sub division.
