Dkut ka jingkieng doidoi ba pynïasoh ïa ka shnong Mawmahwar bad Lawblei, hiar jurip ka KSU

Mawkyrwat, Jymmang, 14: Ka Jingkieng doi doi kaba don ha shnong Mawmahwar bad Lawblei kiba hap ha khappud jong ka Mawphlang Constituency bad ka Mawkyrwat Constituency hadien ka jingwan u slap uba jur ha ka step jong ka 13 tarik u Jymmang, 2022 ka la shah rong noh ha ka um saw bad ka la pynsah sa tang u ksai ba pynbat malu mala.
Katkum ka jingïoh lum jingtip la ong ba kane ka jingshah rong jong kane ka jingkieng ka dei ha ka por 10 baje ei ei mynstep ha ka por ba u ‘lapbah ‘lapsan u dang ther bha. Shuh shuh la pynpaw ruh ba da ka jingdkut jong kane ka jingkieng ka la buh jingeh bad buh jingma shikat dei ïa ki paidbah jong kane ka dong ka thaiñ kiba ju pyndonkam ban ïaid na kane ka jingkieng.
Ha kajuh ka por la ong ba tang shu ïoh jingtip halor kane ka jingjia ba shah rong ka jingkieng, ka Khasi Students’ Union (KSU) jong ka South West Khasi Hills District bad ka Khasi Students’ Union (KSU) jong ka Mawkyrwat Circle ki la hiar bran bran ban leit jurip ïa katei ka jingkieng kaba la dkut bad ha kaba ki paidbah ki la mat jingmat jingeh. Namarkata, ha kaba ïa dei bad kane ka jingkieng na ka liang jong ka KSU ka la kyrpad ïa ki nongmihkhmat jong ki ar ki constituency, ka Maw-phlang Constituency bad ka Mawkyrwat Constituency ba kin pynkloi ban leh ei ei halor kane ka jingkieng namar ki paidbah jong kane ka dong ka thaiñ ki ju pyndonkam ïa kane mynta ki la mat jingeh bad ap jingma ruh de ïa ki ha ka leit ka wan.
Ha kane ka sngi ïa ka KSU la lamkhmat da u samla Jiedskhem Nongsiej, Genl. Secy KSU South West Khasi Hills District bad u Pauldip Tongwah, President ka KSU Mawkyrwat Circle, ki dkhot jong ka seng lem ruh bad ki ‘riew rangbah jong ki shnong.