Nongstoiñ, K’lyngkot 15: Ka jingryngkang dieng-kper jong ki nongmihkhmat na kawei ka party sha kawei pat, ka dei ka jingbym neh jingmut bad ka jingbym sngewthuh ïa ki nongrim treikam jong ki party kiba ki la jop ha ka sien ba nyngkong jong ka jingïaleh elekshon, kyn-thoh ki nongïaleh Hill State ïa ki nongmihkhmat kiba ju mlien ban phet na kawei ka party sha kawei pat, khamtam eh ïa kiba la jop na ka party HSPDP kum u bah Renikton Lyngdoh Tongkhar MLA ka Maw-kyrwat, u ba bat ruh mynta kum u Myntri ka tnad sam umbam umdih, u ba la leit pynïasoh noh sha ka United Democratic Party bad ïa u bah Samlin Mal-ngiang MLA ka Sohïong constituency, u ba dang shu leit pynïasoh shen sha ka National Poples Party.
Katto katne ngut ki nongïaleh Hill State ba kynthup ïa u bah O.Lyng-doh, Bah D.Lyngdoh, Bah S.Myr-thong haba ïakren bad u nongthoh khubor, ki la ong ba kum ki riew rangbah kiba la mih shkhmat ban ïa shim bynta ha ka jingïakhih ban dawa na ka sorkar India ban ai noh da ka jylla ba pura, ki sngew diaw haduh katta katta ban ïohi ba ki nongmihkhmat ha kine ki sngi kim ju neh ha kajuh ka party, wat la ki dei ki party kiba la pynjop ïa ki naduh ba ki sdang ban ïaleh Election, la ka dei ha ka Election MDC ne MLA ruh.
Kitei ki rangbah ki la ong ruh ba kane ka jingphet party, ka la sdang naduh ka por ba dang shu ïoh ïa ka jylla ba pura da ki nongmihkhmat kiba la jop na ka party HSPDP bad ka raibi ka la hiar haduh kine ki sngi. Ki la ong ba ka jingphet party ka dei ka raibi ka bym lah shuh ban pynduh, lymda don ki aiñ kiba khlaiñ ban pynshitom ïa kiba phet na kawei ka party sha kawei pat.
Nalor kata ki la ong ruh ba ki daw kiba pynlong ïa ki nongmihkmat la ki dei na ka Congress, HSPDP, UDP, KHNAM, PDF, BJP bad kiwei kiwei ki don bun bha. Katto katne ki daw ba ki la jer ki long ba ki nongmihkmat ki bym sngew ei ei lada ki phet noh na ki party ba ki la jop, ki long ka jingbym shkem ka jingmut jingpyrkhat, ka jingbym sngewthuh ïa ki nongrim treikam jong ka party kaba ki la jop bad wat lada ki sngewthuh ruh, kim khieñ kor namar ki nongrim treikam jong baroh ki party ki dei na ka bynta ban ai jingmyntoi ïa ki paitbah, ym na ka bynta jong ki shimet namar ki la ïoh da ka tulop.
Ki la ong ruh ba kiwei pat ki daw ki lah ban dei na ka jingkwah long Minister, lane Chairman, kwah long CEM, EM khnang ba ki paitbah kin burom bad kin ïoh shibun ki jingmyntoi. Ki la ong ruh ba ha kine ki sngi lei lei ka jingphet party jong ki nongmihkhmat, ka la pyni jaboh bad pynjah burom khait ïa ka saiñ pyrthei hapoh ka jylla.
Ym lah ban len ïa ka jingshisha, ba nyngkong eh ka sdang na ki MDC kum u bah Batskem Ryntathiang u ba jop kum u MDC na ka Congress, hynrei hadien u wan rung sha ka HSPDP mynta pat u la leit phai biang sha ka Congress. Nangta ki san ngut ki MLA Congress ki la leit pynïasoh noh sha ka National Peoples Party, namar ka Congress ka la suspend ïa ki bad lada kin neh sah ha ka Congress kin duh ban ïaleh election.
Kitei ki rangbah ki la ong ruh ba baroh shi katta kitei ki nongmihkhmat kiba la leit pynïasoh sha ka NPP, ki ju kynnoh bad ki byrthen ïa ka UDP, HSPDP, KHNAM, PDF ba ki dei ki team B jong ka BJP. Katba mynta ïa lade pat ki kylla team C, da kaba ong ba kampher wat la ki MLA ka BJP ruh ki don lang ha ka sorkar MDA tang ban ïoh ïaleh elekshon biang.
Katei ka jingleh jong ki kam dei tang ba ka pynjah burom ïa ka saiñ pyrthei ha ka jylla, hynrei ka pynishai kdar ba ka jingrung jong ki sha ka saiñ pyrthei, ka dei namar ba ki kwah spah, kwah bor, bad kwah burom ïalade bad kim salia ban thok ban lamler ïa ki paitbah ha ki por ialap election. Hynrei ynda ki la jop ki die tad dor pat ïa ki paitbah kiba la pynjop ïa ki, tang na ka bynta ka shuki hato kaei ka ban jia lada ki paitbah kin shaniah kum ïa kitei ki nongmih-khmat.
Ki la ong ba dei hangne keiñ ba ka jingkren jong u (L) bah Hopingstone Lyngdoh ba uno uno u ba shet kylla ïa ka party un ïap hi. Kumta lada ki nongmihkhmat ha ka jylla kim pyrkhat thymmai bad kim kylla kaba mut nangne shakhmat, ka jingïap kam dei ïa ki hynrei ka ngat ha ki rit ki ria ki rangli ki juki.
