Aiti u Bah Pius ïa ka Community Hall kaba T. 10 lak ha ka shnong Lower Rajapara

Mawkyrwat, K’lyngkot, 15: U bah Pius Marweiñ, MLA/MDC jong ka Ranikor Constituency ha ka sngi saitjaiñ jong ka taïew u la ïoh ban plie paidbah ïa ka Community Hall hapoh shnong Lower Rajapara kaba hap hapoh jong ka Ranikor Civil Sub Division, South West Khasi Hills District bad ha kajuh ka por u la ïoh ruh ban aiti ïa ka ha u Myntri jong ka shnong.
Lah ban kdew ba ïa kane ka Community Hall ba la plie paidbah la shna lyngba ka MLA kaba ha ka jingmang pisa kaba T. 10 lak tyngka.
U bah Pius Marweiñ kum u kongsan haba kren ha ka jingïalang ba lyngkot u la ong ba ka jingplei ïa kane ka Community Hall kan sa long kawei na ki lad jong ka jingïarap ïa ka shnong ha kaba kin ïoh ban pyndonkam bad pynlong ïa ki jingïalang ba bun jait. Ha ka juh ka por u la pynkynmaw ruh ba ka jingïoh ban plie ïa kane ka Community Hall ka dei hadien ka jingangnud jong ka shnong lah da ki phew snem, hynrei lyngba ka jingtrei shitom jong u ryngkat ka jingïasngewthuh jingmut lang bad ki nongpynïaid shnong ha kaba ha ka 14 tarik u Kyllalyngkot, 2023 ka jingangnud jong ki ka la urlong.
“Ka jingdon jong kane ka Community Hall kan long ka jingïarap ïa ki paidbah ym tang ha ki jingïalang jong ka shnong ka thaw hynrei ban kiwei de kin ïoh ban pyndonkam namar kane ka shnong ka dei kawei na ki shnong ba mar khap bad ka Bangladesh khnang ba ki shipai BSF ruh kin ïoh ban pyndonkam ban pynlong ki jingïapyrkhat ban wanrah ïa ka jingshongsuk shongshngaiñ jong ki paidbah”, ong u bah Pius.
Ha kane ka sngi la ïadonlang naduh u Myntri Shnong jong ka Shnong Lower Rajapara, ki paidbah jong ka Shnong naduh ki longkpa longkmie, ki samla bad kumjuh ruh ki riew rangbah jong ka dong ka thaiñ.