Dep pynpra ki bor District haduh 13 tylli ki karkhana Coke beaiñ ha West Khasi Hills

Nongstoiñ, Naitung 18 : Ki bor District ka West Khasi Hills, ki la dep ban pynpra ïa ki atoskhana jong ki 13 tylli ki karkhana coke beaiñ ba don hapoh ka District bad la buh thong ruh ba hapoh 30 sngi, yn sa lah ban pynpra lut ïa baroh 57 tylli ki karkhana beaiñ.
a kane la pyntip da u Deputy Commissioner ka District lyngba ka kyrwoh, haba pyntip ruh ba ki bor District ki la dep ban kem haduh 6 ngut ki briew kiba dei ki trai jong kine ki karkhana ïa kiba la register case hapoh Shallang Police Station lyngba ka PS Case No.39(12)2022U/S188/34/379/120BIPC R/w Sec 15 Environment (Protection)Act, Sec 3 jong ka Explosive Substances Act bad Sec 51(1), Benami Transaction (Prohibition) Act, 2016.
Kine ki 6 ngut ki kynthup ïa u Youdishthra Bham na Assam, u Ashish Arya na Guwahati Assam, u Khrawbok Rongrin na Shallang, u Hopeful Nongtdu na Rymbai Synrang, East Jaiñtia Hills, u Yaman Bansal na Beltola, Guwahati Assam bad u Eras Dkhar na Nongstoiñ, West Khasi Hills.
U Deputy Commissioner u pyntip ba ki karkhaan coke beaiñ ba la pynpra ïa ki atoskhana ki dei kiba don ha Nonglangpar (Kyllonmathei) kiba don ha ki co-ordinate (i) 25.5220613, 90.9035105 (ii) 25.5224573, 90. 8992605 (iii) 25.5201515, 90.9032912 (iv) 25.5185800, 90.9041877 (v) 25.5174384, 90.9062416 (vi) 25.5128946, 90.9028738 (vii) 25. 5138295, 90.9038863 (viii) 25.5146504, 90.9051718 (ix) 25.5146671, 90.9067402 (x) 25.5177594, 90.9006992 (xi) 25.5191951, 90.9023759 (xii) 25.5214483, 90.9009416 bad (xiii) 25.5212888, 90.8993075
Lah ban kdew hangne ba ki don haduh 57 tylli ki karkhana coke ba beaiñ hapoh ka thaiñ Shallang bad ki bor District, ki la dep ban khang tala ïa kine ki karkhana naduh u bnai Nohprah 2022 hadien ka jingbthah jong ka Ïingkashari Meghalaya High Court.
U Deputy Commissioner u pyntip ba ha u bnai Rymphang haduh Ïaiong 2023, ki bor District ki la pynpra noh ïa ki jaka shet bad ki pipe ba pynïasoh bad ki atoskhana jong kine ki karkhana beaiñ ban pynthikna ba kin ym lah shuh ban dang treikam.
Haba pyntip ba katba ka bor District ka dang ap ïa ka kaiphod na ka Committee bala thung da ka Sorkar, kaba kheiñ ba diah halor ka jingdon u dewiong ha kine ki karkhana (Audit Committee on Source of Coal), ka bor District ka la khang haduh saw tylli ki karkhana ki ba don ïa ki kot ki sla kiba biang (Valid CTE, CTO) bad kine ki kynthup ïa ka M/s Shemphang Riangshiang, Pyndeng Jalong, Doranggri, Shallang, M/s Rilyngngam cok Industries, KyllonMathei, Shallang, M/s M.D. Coke Industries bad M/s Carbochemical India kiba don ha ka shnong Nongdakong,Shallang.
Hadien ba ïoh jingmynjur na ka Sorkar Jylla hapoh ka jingïalam bad jingkhmih jong u Bah H.K. Thabah, MCS, Additional Deputy Commissioner, I/c Mawshynrut Civil Sub-Division, la thaw ïa ka kawei ka kynhun kaba kynthup ïa ki Gazetted Police Officer, Meghalaya State Pollution Control Board, Commerce bad Industries na ka bynta ban pynpra bad pynbthei noh ïa ki Atoskhana jong ki 57 tylli ki karkhana saiñ dewiong beaiñ kiba la shna khlem ka CTE.
Na ka bynta ka bha ka miat bad ka suk ka saiñ jong u paidbah, la pynjari ïa ka hukum hapoh ka kyndon 144 CrPC kaba la pynmih ha ka 11.07.2023, ban khang pyrshah ïa ka ïaid ka ieng jong ki paidbah ne kino kino ki kynhun ha ka radius kaba 1 kilometer na ka jaka ba don kitei ki karkhana saiñ dewiong beaiñ. La bthah ruh ïa ki paidbah ba kin ïatreilang bad ki bor synshar District katba kane ka kam ka dang ïaid, bynrap shuh shuh u Deputy Commissioner.