Dei ka khun u Chowkidar ba ïohi ïa ka jingsdang klang ka ding ha Shillong Bar Association

Shillong, Rymphang 25 : Dei ka khun u Chowkidar ka Shillong Bar Association u Bhola Yadav kaba ïohi nyngkong ïa ka jingsdang klang ka ding ha ka miet Sngi Saitjain ha ka por 10.15 baje ei ei mynmiet. Mar ïa ïohi ka la ïathuh ha u kpa bad u kpa mar mar u la pyntip sha Fire and Emergency Services hynrei namar ba ka dei ka ïing dieng kaba la rim bha bad ba dap ruh da ki kot ki sla kumta wat la ki pulit pynlip ding ki la wan poi kloi ha katei ka jaka ruh ka ding kaba ïeng klang ka la bamduh ïa katei ka shlem saiñdur jongki Muktiar jong kane ka nongbah.
Kane ka shlem saiñdur ki Muktiar ne ka Shillong Bar Association ka la palat ïa ka 100 snem ei ei. Hooid ïa ka Shillong Bar Association la seng nongrim ha u snem 1913 hynrei ïa kane ka ophis treikam jongki la shna kham hadien. Kane ka ophis treikam ki Riewsaid aiñ ka la kylla dpei ha ka miet Sngi Saitjain ha ka ding kaba klang kaba la bam duh lut khait ïa ki kot ki sla, ki uniform jong ki riewsaid aiñ, ïa ka library bad baroh kat kiba don ha katei ka ïing ophis.
Wat la ym pat tip ïa ka daw tynrai jong ka jingkem ding kane ka jaka shong ki riewsaid aiñ hynrei la suba jur ba ka dei na ka bording electrict hi. U Bhola u la ïathuh nyngkong la wan kawei ka kali pynlip ding bad pyrshang ban pynlip ïa ka ding hynrei namar ba ka ding ka la klang palat kumta ka la ïoh ban bam duh ïa katei ka ïing ophis.
Ki riewsaid aiñ ne ki muktiar ki ïathuh ba da ki hajar tylli ki kot ki sla kiba don la palat spah snem ki la ingkhong khait lut.
U President ka Shillong Bar Association u HR Nath u la pynpaw ka jingkyndit bad sngewsih kaba khraw halor kane ka jingjia bym poi pyrkhat. “Kane ka dei ka ïing kaba la rim bha bad ngi la ïai pyrshang ban bud dien ban buh ïa ki record ha ki kor digital hynrei ym pat ïoh pyndep ïa kane la jia noh kane ka jingpluh bad baroh ki kot ki sla ki la kylla dpei lut” ong Nath.
Na ka liang u IG jongka Meghalaya Fire and Emergency Services u bah Francis H Kharshiing u la ai ka jingïaroh ïa ki pulit pynlip ding kiba la trei shitom bad lah ban tem ïa ka ding hapoh ar kynta bad ka la lait ban pur sha kiwei ki ïing ophis ba mar jan.
“ Kat kum ka record ba ngi la ïoh jingpyntip ka long ha ka por 10.15 Pm bad mar mar la phah ïa ki kali pynlip ding na Iewduh. Nga ruh tang hapoh phra minit ka la poi ha katei ka jaka bad ngi la pyrshang katba lah ban tem ïa kane ka jingklang ka ding” ïathuh u bah Francis.
Na ka liang u Myntri Rangbah ka jylla u Conrad K Sangma, u Symbud Myntri Rangbah ma Sniawbhalang Dhar, Chief Secretary bah D.P Wahlang bad kiwei kiwei ki ophisar sorkar ki la ïa poi hynnin hi ka miet sha katei ka jaka ban leit peit da la ki jong ki khmat ïa ka jingshah bamduh katei ka shlem saiñdur jong ki Muktiar ha ki tylliej ding.
“ Nga la leit jngoh ia katei ka Shillong Bar Association da lade ban ïohi ïa ka jingjia ba sngewsih hynrei tang kawei kaba nga sngew kmen ka long ba ym shym la don ka jingiap ha katei ka jingkem ding jong katei ka ïing. Nga sngewsih jur haduh katta katta ïa ka jingduh noh jong ki paralok Nongsaid aiñ ïa katei ka ïing bad ka sorkar kan sa shong pyrkhat halor kane” ong u Myntri Rangbah.