“Dei ka jingïasylla ban pynpulom ïa ka jingïalang u CM bad ki Sengbhalang” ong ka NPYF

By Mawphor News Desk On Jul 26, 2023

Shillong, Naitung 25 : Ka National People’s Youth Front (NPYF) ka la ñiew ïa ka jingthombor ki paidbah ia ka Chief Minister Office (CMO) ha Tura ka dei tang ka jingïasylla bymman ban pynpulom ïa ka jingïakren ba jai jai hapdeng u Myntri Rangbah ka Jylla Conrad K Sangma bad ki Nongmihkhmat ka ACHIK, GHSMC bad kiwei myn ha ka 24 tarik Naitung.
Haba pynrem jur ïa kane ka jingjia, ka NPYF ha ka kyrwoh ka la ong “ Ka huri hura bad ka jinghiar thma ïa ka CMO, Tura, ka dei ka jingïasylla bymman jong kine ki riew bymman”.
“Ngi pynrem jur ïa kane ka jinghiar thma, kaba lah ban buh ha ka jingma ïa u Myntri Rangbah ka Jylla. Kine ki briew ki la wan sha kane ka jaka da ka jingmut ban pynthut bad pynpulom ïa ka jingsuk” kala ong.
Ka kyrwoh ka ong ba ka jingdawa ïa ka winter capital ha Tura ka dei ka jingthrang jong ki paidbah ka Ri-lum Garo bad ka donkam ïa ka jingïakren bad ki bor synshar khadar ba kynthup lang ïa baroh ki kynhun bapher bapher.
“Ka long kaba pang mynsiem ban ïohi ïa ki kam khawpud jong ki katto katne ki kynhun pynkulmar shnong, kiba, khlem ka jingsngewkhia lang ïa ki paid Garo, ki la shim ïa ka lynti ban kawang maw ïa ka CMO Tura hapdeng ka jingïalang. Kum kine ki kam ki pyni ïa ka jingbym kheiñ kor ïa ka bha ka miat jong ka Jaidbynriew bad kheiñ poh ruh ïa ka jingpyrshang ban wad ïa ka jingïapynbeit lyngba ka lynti ba jai jai”.
Ka kyrwoh ka ong ba u Myntri Rangbah ula mynjur ban ïakynduh ïa kine ki kynhun hajan ka jaka ba shong shah jingit jong kine ki kynhun ba ïakhih bad kane hi ka pyni ba u Myntri Rangbah u don shisha ïa ka jingsngewkhia.
Nalor kane, ka NPYF ka la ong ba ka Ambulance kaba kit ïa ki Pulit ba mynsaw ruh kam dei ïa ka ban shah kawang maw namar ka long kaba kongsan ban ïada ïa ka jingim bad ai jingïarap ïa kito kiba donkam.
Haba dawa ban leh tyngeh ïa kine ki nongpynkulmar shnong, ka NPYF ka la kyntu ïa ki Nongshong shnong ban ïai long kiba jai jai bad ban ailad ïa ki bor ka aiñ ba kin trei bad ïatreilang kat kaba lah na ka bynta ban ïohkem ïa kine ki briew ba lehtam.