Dei ka jingïapait ka Congress bad TMC ba sa jop kput ka NPP na rilum Garo: Rupert Momin
Nalor ba trei bha ka Sorkar MDA ha ki san snem
Shillong, Ïaiong 01 : U MLA ka National People’s Party (NPP) na Kharkutta, u Rupert Momin u la ong ba ka jingjop donburom jongka party na rilum Garo ha kane ka elekshon MLA ba dang shu dep kadei namar ki ïohi ïa ka jingtreikam bha jong ka sorkar Meghalaya Democratic Alliance – 1 ha ki san snem ba la dep.
Lah ban kdew hangne ba ka NPP ha rilum Garo na ki 24 tylli ki constituency, tang marwei hi kala ïoh ban jop haduh 18 tylli, katba ha rilum Khasi – Jaintia pat kaba don 36 tylli ki constituency, ka NPP ka ïoh tang phra ngut ban jop.
“Ka sorkar MDA-1 ka la pyni shisha ïa ka jinglah jong ka ban trei bha ha rilum Garo. Ym tang ha rilum Garo hynrei wat ha ki jaka jong ka Jaintia Hils bad Khasi Hills ruh,” ong u Momin haba kren bad ki lad pathai khubor.
Shuh shuh u ong ruh ba ka sorkar MDA ka la lah ban pynnneh ïa ka shong suk shongsaiñ ha baroh kawei ka jylla.
“Ka sorkar MDA ka la lah ban phah shna ïa ki surok, ki lad kamai kajih, ka jingkyntiew ïa ki nongkyndong bad kine ki dei katto katne kiba la ktah bad pynlong ïa ki padidbah ban pynjop kham bun ha ka elekshon ba la dep,” ong u Momin.
Haba jubab halor ka jingkylli, utei u MLA ka Kharkutta u la ong ruh ba ka NPP ka kham ïoh bor kadei namar ka jingïapait jong ka Congress bad TMC. “Ngi ïoh ïa kane ka result kaba bha kadei namar ka jingïapait jong ka TMC bad ka Congress. Kumba nga la kdew, ngi la ïohi ruh bun bha ki kam pynroi ha kine ki san snem bad wanrah ruh ïa ka suk ka sain ha rilum Garo.”
Ha kajuh ka por u la kyntu ruh ïa kiwei pat ki nongïalam jong kiwei kiwei ki sengsaiñpyrthei ba kin ïatrei lang naka bynta ka bit ka biang jong ki paidbah bad ruh ban pynlong ïa ka Meghalaya ka jylla kaba biang ha baroh ki liang.
“Ka shong ha ka thong jongngi, kumno ngin trei na bynta ki paidbah namar na ka liang jongnga hi, nga la rai ban trei na ka bynta ki paidbah ka constituency, kata kadei ka thong,” u la ong.