Dei ha ka por ka Sorkar Congress la pynduh noh ïa ka sboh dawai : Bah Banteidor Lyngdoh

Shilong, Nailar, 21: U nongïalam jong ka People’s Democratic Front (PDF) u Bah Banteidor Lyngdoh u la ong ba ka jingpynduh ïa ka sboh dawai ka la jia ha u snem 2014 ha ka por ba dang synshar ka Sorkar Meghalaya United Alliance (MUA) ba la ïalam da ka Seng Congress bad ba u Bah Prestone ruh u dang long u Myntri Sorkar.
Kane ka jingkynthoh jong u Bah Banteidor ka long hadienba la kylli halor ka jingkam jong u Bah Prestone ba u Myntri Rangbah u Conrad Sangma lem bad u, ki la shim ïa ka rai ban ai subsidy sha ki nongrep na ka bynta ban ïoh ïa ka dawai sboh.
“U (Bah Prestone) ruh u don lang ha ka Kynhun Myntri ha u snem 2014 haba la pynduh noh ïa ka dawai sboh. Ka Sorkar Congress kaba rim ka la shim ïa kane ka rai khlem da ïasyllok bad ki nongrep jong ka jylla,” la ong u Bah Banteidor Lyngdoh uba long ruh u Myntri ka tnat ka Rep ka Riang ka Sorkar Jylla.
Haba kylli, hato ka dei neem ba ka National People’s Party (NPP) ka pyrshang ban kam ei khlem da ïasyllok lang bad u shwa ban shim ïa kane ka rai ban ai subsidy sha ki nongrep, u Bah Banteidor u la ong ba u sngewthuh ba kam don eiei kaba bakla ban ïoh jingmyntoi saiñpyrthei namarba ka elekshon ruh ka la jan.
U la ong ruh ba ka tnat ka Rep ka Riang ka ladep pynmih ïa ka hukum naduh ka 9 tarik Nailar ha kaba ïadei bad ka jingkhang ban pyndonkam ïa ka dawai sboh.
U la pyntp ba ka tnat ka Rep ka Riang, ka ladep pynlong ïa ka jingïalang bad ki katto katne ngut ki MLA ha kaba la ïadonlang ruh ki nongrep ha ka 18 tarik mynta u bnai ban ïakren halor ka Office Order. “Hynrei nga kwah ban kren shai ba ka PDF kam shym la ïalehkai politik ha kaba ïadei bad ka jingeh kaba ktah ïa ki nongrep. Nga sngew ba ngim dei ban shu ïalehkai politic haba ki don kino kino ki jingeh kiba ktah ïa ki nongrep. Ka jingïalehkai politik kan dei tang ha Secretariat hynrei ym ïa ki nongrep,” u la ong.
Shuh shuh u la pynshai ba ka jingweng noh ïa ka jingpynjari kyndon ban khang pyndonnkam ïa ka dawai sboh ka long tang ïa ki shnong kiba la shah ktah hynrei ym ha baroh kawei ka jylla.
“Tang ki nongrep kiba rep sohsaw, rep phan, rep kubi la pyllait na ka jingshah khang ban pyndonkam ïa ka dawai sboh. Ki nongrep kiba rep ïa kine ki mar rep, ki donkam ïa ka dawai sboh ban pynmih kham bun ïa kine ki mar rep,” ong u Bah Banteidor.
Haduh mynta u la ïathuh ba ka Sorkar Jylla ka la buh hakhmat ïa ka thong ban kyntiew ka jingrep khlem dawai sboh (organic farming).
Katkum ka jingong jong u Bah Banteidor, ka jingshim rai ban weng noh ïa ka jingkhang pyndonkam dawai sboh ha ki katto katne ki shnong kiba la shah ktah ka ka long hadien ba ka tnat ka Rep ka Riang ka la bishar bniah bha.
Dang shen, u Symbud Myntri Rangbah u Bah Prestone u la ong ba ka Sorkar Jylla ka la rai ban ai subsidy na ka bynta ki nongrep na ka bynta ban thied ïa ka dawai sboh.
“Ngi la shim ïa kane ka rai ryngkat bad u Myntri Rangbah. Ngi la shim ruh ïa ka rai ban ai subsidy kaba 50 na ka 100 sha ki nongrep kiba donkam ban thied ïa ki sboh dawai,” u la bynrap.