Dei ban wanrah noh da ka official bill ha Parliament ban ïoh jingithuh ka Ktien Khasi: KAS

0

Shillong, Risaw 05 : Ka Khasi Authors’ Society (KAS) ka la pynpaw ba ka sorkar pdeng kadei ban wanrah noh da ka aiñ rew na ka liang ka sokrkar ne ka Official Bill Synshar ka Ri hapoh ka Dorbar ban wan jong ka ïingdorbar Parliament.
“Kadei tang kane la lynti kaba lah ban plie lad ba ka ktien Khasi kan ïoh rung ha ka khyrnit kaba phra jong ka riti synshar ka ri India”, ong u Dr. DRL Nonglait, President ka KAS haba ïakren bad ki nongthoh khubor mynta ka sngi. U Dr. Nonglait u la ong ba kane kadei kawei na ki rai kiba la shim hadien ba la pynlong ïa ka Seminar bad ka jingiakhih ha nongbah Delhi dang shen.
Ula ong ba ka KAS kala rai ruh ban pan ïa ka jubab na ka Ophis u Myntri kam Pohiing ka Sorkar India ban tip hangno kala poi ka dorkhas ba dawa ban pynrung ïa ka ktien Khasi ha ka khyrnit ba phra ka riti synshar ka Ri.
Shuh shuh u la ïathuh ba ka KAS kala ïakynruh ruh ia u Myntri kam pohiing barim u Rajnath Singh ha u Kyllalyngkot 2019 bad ïa u Myntri kam pohiing ba mynta ha ka 24 tarik naitung, 2021 ha Shillong.
“Hynrei ngi dang ioh ïa ka jubab na ka MHA tang ha u Lber 2019 bad hadien kane ngim shym la ioh jingtip shuh, ym don satia ka jingaiktien na ka Ministry sha ka Seng lane wat sha ka Sorkar Jylla. Ta ka daw ngi la shim ïa ka rai ban pan ïa ka jubab na ka Sorkar India” ong u Dr Nonglait.
Kat kum ka jingong jong u, ka KAS kan ap ïa ka dorbar ban wan jong ka Parliament hashuwa ban shim ïa kano kano ka rai halor ki sienjam ban sa shim hadien habud.
Haba jubab ïa ki jingkylli, u Dr. Nonglait, u la ong ba ka jingbym poi lut ki Seng ne ki Nongmihkhmat sha kane ka Seminar bad ka jingïakhih ba jai jai dei namar ba khlem ai shithi ïa baroh, hynrei la ai tang ïa ki katto katne ki Myntri sorkar jylla kiba long kum ki Kongsan ban wan plie ïa ka Seminar bad ïa ki arngut ki MP jong ka jylla kiba dei na ka jaidbynriew Khasi, kata u Bah Vincent Pala, MP ka Lok Sabha bad u Dr. WR Kharlukhi, MP ka Rajya Sabha. Lait nangta la shu wer beit lyngba ki lad pathai khubor.
Lah ban kdew hangne ba ka jingdawa ban pynrung ïa ka ktien Khasi ha ka Khyrnit kaba phra ha ka riti synshar jong ka ri India kadei kaba la slem bad ka ïnngdorbar Thawain ka jylla ruh ka la mynjur wat ïa ka Resolution halor kane ka jingithuh ïa ka ktien Khasi bad Garo.
Kumba long mynta ka ktien Khasi bad Garo kila dei ki associate official language ne ka ktien bynrap ha ki ophis sorkar jong ka jylla.

Leave A Reply

Your email address will not be published.