Ban weng na ka jingkyrduh bording ha ka jylla bad ka thaiñ, lum ka MNRE ïa ki Myntri ha nongbah Delhi

Shillong, Risaw 5 : Khnang ban weng ïa ka jingkyrduh bording ha ka jylla bad ka thaiñ shatei lam mihngi hi baroh kawei ka tnad Ministry of New and Renewable Energy (MNRE) jongka sorkar pdeng ka la lum ia baroh ki myntri jong ki tnad pynmih bording jong ki jylla kane ka thaiñ ha nongbah New Delhi mynta ka sngi Palei ban ïakren bad ïamir jingmut halor kane ka phang. Ia kane ka jingialang la pyniaid da u Myntri ka tnad pynmih bording ka sorkar pdeng.
Na kane ka jylla la ïalam ïa ki ophisar da u Myntri ka tnad pynmih bording u A.T Mondal ban ïadon bynta lang ha katei ka jingïalang. Kane ka jingïalang kan ïatai sani bha kumno ban pynkhlaiñ ka jingpynmih bording na kiwei kiwei ki lad pynmih bording ym ban shaniah tang na ka um khnang ba ka bording kan long kaba pahuh ha kane ka thaiñ.
Haba kren ha ka jingïalang na ka liang u Mondal u la ïathuh lyngkot ïa ki jingpyrshang jongka jylla ban pynmih bording na kiwei ki lad bad kiei ki jingeh kiba ka jylla ka ïakynduh haba pyrshang ïa kne ka kam. U la banjur ïa ka jingdonkam ban weng ïa ka jingeh jong ki paidbah na ka jingbym biang ka bording ha ka jylla bad kane ka thaiñ hi baroh kawei.
U la ïathuh kum ka jingsdang ha ka jylla ïa ka jingpynmih bording lyngba ka Sngi la sdang ïa ka Chief Minister Solar Mission (CM SM) bad kane ka dei kaba la thrang hi da u Myntri Rangbah bad ka thong ka long ban pynbiang bording ha ka jylla lyngba ka Solar. U la ïathuh ruh ba ka sorkar ka la jop ha kaba pyntreikam ïaka Solar Cold Storage bad Solar Food Processing Unit. Kine ar tylli ki la ïarap bha ïa ki nongrep ban buh ïa ki mar rep jongki bad kumjuh ruh ban seng ïa ki karkhana ba rit lyngba ka Solar.
Kiwei kiwei ki jingai jingmut ki kynthup ïa ka jingïarap mang pisa ka sorkar pdeng na ka bynta ka Solar Roof Top Scheme, ban ïatrei lang bad ki kompani na ka bynta ka Solar Parks bad Pump Storage Scheme. Ka Subsidy ba ka sorkar ka la pynkhreh ka long 7.5 klur na ka bynta 1 MW bad ki projek ki dei ba long naduh 1 MW haduh 25 MW. Hooid ïa kane ka projek la pynsangeh noh shipor hynrei mynta u myntri ka tnad pynmih bording jongka sorkar pdeng u la kular ban shim khia ïa kane ka kam bad shen yn sa sdang biang noh.
U Myntri u la pyntip ruh ïa ka jingthmu pyrshang ïa ka Pump Storage Project ha ka jylla namar ka jylla ka biang bha halor kane bad na ka bynta kane la pynkhreh saw tylli ki projek da ka jingïarap jongka NTPC bad lah ban lum ïa ka bor ding haduh 31000 MW hynrei ka jingeh kaba don ha khmat ka long ka pisa ban sdang ïa kitei ki projek.
Kumta halor kane ruh u la kyntu ïa u Myntri ka tnad pynmih bording ban ïarap pisa khnang ban ïoh sdang ïa kine ki projek bad ïarap ïaka jylla ban lait na ki jingkyrduh bording. ïa u Myntri la synran lang da u Sanjay Goial IAS Commissioner bad Secretary Power bad Dr Joram Beda IAS, Director MNREDA bad Commissioner bad Secretary ka sorkar jylla.