Shillong, Lber 16: Ka Kaiphod jong ka CAG ka la ong ba ka jingbym lah ka Tnad Excise ban lum ïa ka khajna excise duty ka la ïalam sha ka jingduna ha ka jinglum ïa kane ka khajna haduh T.14.58 klur bad ka CAG ka la ai jingmut ban tohkit bniah ïa ka jingleh bakla bad pyntreikam pyrkhing bha ïa ki jingpynbna ne notification ka Sorkar haba ïadei bad ka dor jong ka khajna.
Ha kaba ïadei bad kane haba leh audit ïa ki kot ki sla ba ïadei bad u Superintendent of Excise (SE), Tura hapdeng u Ïaiong 2018 haduh u Lber 2019, la lap ba ka Tnad ka khlem lum ïa ka excise duty katkum ka dor ba la buh, bad kane ka la lam sha ka jingduna ha ka jinglum ïa ka khajna haduh T.14.58 klur, ong ka CAG ha ka kaiphod halor ka jingïoh lum pisa ka Sorkar jong u snem ba kut ha ka 31 tarik Lber, 2023.
La ong ba na ka excise duty baroh lang kaba dei ban siew, kaba long T.41.90 klur, ka khajna ba la lum na ki lai tylli ki Bonded Warehouse (M/s Hill View Bonded Warehouse, Araimile, West Garo Hills, M/s Gloria Bonded Warehouse, Tura bad M/s Tura Bonded Warehouse) ka long T.27.32 klur, kumta, ka la don ka jingduna ba T.14.58 klur (35%).
“Ïa kane ka jingbym ïahab la pyntip sha u Superintendent of Excise, Tura ha u Jylliew 2020 bad kumjuh ruh sha ka Sorkar ha u Nailur 2023,” la ong ka kaiphod.
Ha u Nohprah 2023, u Commissioner of Excise, Meghalaya ula phah ïa ka jingthoh ba pan ïa ka jubab na kine ki warehouse kiba siew ïa ka khajna.
Nalor kane, u Superintendent of Excise, Tura ula pynmih ïa ka hukum ban siew ïa ka pisa ba suba sha ki Bonded Warehouse ba la jer haneng bad ruh sha u Officer-in-charge ha u Kyllalyngkot 2024.
Ïa ki jingtip ba bniah halor ka jinglum ïa ka pisa ba duna ym pat ai jingtip satia ban leh audit (Ïaiong 2024).
Ka CAG ka la ai jingmut ba dei ban pynlong ïa ka jingtohkit kaba bniah halor kine ki jingleh bakla bad ban pyntreikam pyrkhing bha ïa ki jingpynbna jong ka Sorkar Jylla haba ïadei bad ka dor jong ka khajna.
