Mahila Congress ka la tynruh ïa ka Sorkar Jylla ba ka dei ban pyrkhing noh ïa ki Website phlim dakaid kiba long ka daw kaba pynkiew ïa ka jingshah leh be-ijot jong ki kynthei bad khamtam ki khynnah.
Kane ka dei ka mat kaba khia bha namarba ka jingai laitlan ka pynsniew wat ïa ka jingmut jingpyrkhat jong ki khynnah kiba bat ha kti ha ki Mobile Phone. Ki kmie ki kpa tang ban pynsngewbha ïa la ki khun ki pynthied ïa ki mobile phone khlem da pyrkhat pat ba ka dei ka atiar ba khlaiñbor bha ban pynbha ne ban pynjot ïa ka jingim jong ki khynnah rit kiba dang lung ka jingmut jingpyrkhat bad ym tang katta kaba pynjot ruh wat ïa ka jingim jong kiba la heh la san haba ki pyndonkam na ka bynta kaba sniew.
Kumba ka Sorkar ka la ïakhun thma pyrshah ïa u drok, ka dei ruh ban ïakhun pyrshah ïa ka jingjyllei ki Website phlim dakaid kiba lah ban peit da kaba suk ha ka mobile phone. Lada ka Sorkar ka don ïa ka mon, ka lah da kaba suk ban khanglad ïa kane namarba ka jingsniew ka imlang ka sahlang ka jot namarba ym don ba shimkhia ïa ka jingpynsngew da ki kattto katne.
Sa kawei pat ka mat kaba ktah ïa ki khynnah rit ka long ka jinglaitlan jong ki khynnah ban thied ïa ki jingdih kiba sniew kiba ktah ïa ka bor jingmut jingpyrkhat jong ki bad kumjuh ruh ïa ka bor met bor phad.
Ka Juvenile Justice (Care and Protection of Children) Act kaba thymmai ka la treikam naduh ka 15 tarik Kyllalyngkot 2016 hynrei haduh mynta ym pat ju ïoh sngew koit ba ki bor ba dei peit kin kem ne ai jingsneng ïa kito kiba pynkheiñ ïa katei ka aiñ la ka dei ïa ki nongdie ne ïa ki nongthied ruh kumjuh.
Katkum ka aiñ Juvenile Justice Act khamtam ha kyndon 77 la khang pyrshah ïa ki nongdie jingdie kata naduh kito kiba die ïa ki jingbam duma bapher bapher, ki Raja khoini, talab, Zarda, Rajnigandha,Shikhar, bad kumta ter ter bad kumjuh ruh ki jingdih ba pynsniew ïa ka met kum u sikret, ka kyiad bad kiwei kiwei ba kin die sha ki khynnah skul ne ki khynnah ba hapoh 15 snem ka rta.
Hynrei ha kane ka jylla Meghalaya la ïohi ba naduh ki khynnah rit kiba dang leit skul haduh kito ki bym leit skul ruh ki ïoh beit ban thied ïa kitei ki jait jingbam bad jingdih kata ym tang ïa kito ki bym phong uniform hynrei wat ïa kiba phong uniform ruh. Namar ym lah ban len tharai ym dei tang uwei ne ar kiba ïohi hynrei baroh baroh ki ïohi ba ki khynnah skul kiba phong uniform ne ki khynnah kiba dang rit ka rta ki bym phong uniform ruh ki bam ïa kitei ki jait jingbam bad ki dih sikret bad kyiad khlem salia shuh ïano ïano ruh ha kane ka juk ba mynta.
Mynta leilei wat ki khynnah skul ha ka uniform ruh kim salia shuh watla ki dih sikret ha lynti syngkien.
Haba jia kumne ym tang ba ki thad ïa ka akor bad burom jong ki hynrei ki thad ruh ïa ka burom jong ka skul bad kim nang shuh ban burom ïa ki bahalor. Namar kata ka jingsneng tymmen halor ka akor bad burom ka la jah noh kumba long mynta bad ïano yn kynnoh hato ym dei ïa kita ki bor ba dei peit ban pyntreikam ïa ka aiñ bad kiba ïadon bynta lem bad ka ne ïa ki longïing longsem?
Ka Sorkar ka dei ban pyntreikam pura ïa ka aiñ khnang ba kan ïarap ban tei pat ïa ka imlang ka sahlang, namarba ka imlang ka sahlang ka jot haduh katne dei namar ba ym don ki bor jong ka aiñ ban tehlakam ïa ki khynnah.
Donkam ïa ka jingïatrei lang jong ki Dorbar Shnong, ki kynhun seng trei mon sngewbha kiba trei shisha na ka bynta ka bha ka miat bad kumta ter ter. Kumta khnang ban pyntreikam pyrkhing ïa katei ka kyndon aiñ kaba kongsan ka long ba ka Sorkar ka dei ban ïamir jingmut bad ki dorbar shnong nangta bad seng longkmie, seng samla shnong, ki seng niam namar bad khlem pep yn lah ban pyntreikam hok bad pyrkhing ïa katei ka kyndon aiñ ban tei pat sa shisien ym tang ïa ka bha ka miat ka imlang ka sahlang hynrei wat ïa ka akor ka burom jong ka jaidbynriew.
