Dei ban pyndam noh ïa ka jingpynlong jaka pule shimet ïa ka Tura Medical College, ong ki 10 seng

Shillong, Jylliew 02: Ka kynhun jong ki 10 tylli ki sengbhalang ha ka sngi Nyngkong ki la dawa ïa ka sorkar jylla ban pyndam noh ïa ka jingpynlong jaka pule shimet ïa ka Tura medical college.
Ha ka kyrwoh khubor ba la ïasoilang, kine ki seng ki la ong, “Namar kata ngi kyntu ïa ka sorkar jylla ba kan pyndam noh ïa ka PPP model bad ban pynneh ïa ka Tura Medical College kaba dei pura ka jong ki paidbah. Ym dei ban pyndonkam bakla ïa ka jaka ba la ai da ka jaitbynriew Garo, sngewbha ban burom ïa ki jingnoh synniang jong ki. Buh ïa ka college bad ka hospital hapoh ka jingpynïaid jong kawei ka bor ban pynneh ïa ka kam ai jinghikai bad ka jingshakri ïa ki paidbah. Dei ban pyntreikam ïa kajuh ka model na ka bynta ka Shillong bad Tura khlem da don ka jingkheiñ shilliang hapdeng ki jaka. Ki paid Garo Hills ki dawa ïa ka jingtreikam kaba khuid, kaba ïaid beit, bad ban burom ïa ka bha ka miat ki paidbah. Ka Tura Medical College ka dei ban ai ka jingshakri ïa ki paidbah, ym na ka bynta ka jingmyntoi ki riew shimet. Ngin ym lah ban pdiang ïa ka rukom treikam kaba ïapeiñ bad ka lawei ki samla jong ngi ne ka jingai jingsumar ïa ki paidbah.”
Kiba la soi lang ha kane ka jingthoh ki long ki Senior Citizens, Mothers Union, Garo Students’ Union (GSU), Federation of Khasi-Jaiñtia & Garo People (FKJGP), ADE, A’chik Youth Welfare Organization (AYWO), Federation for A’chik Freedom (FAF), Garoland State Movement Committee (GSMC), A.chik Consciousness Holistically Integrated Krima (ACHIK) bad Post-Graduates Students Union (PGSU), NEHU campus. Kine ki seng ki la kdew ruh ba ka jingbhah jaka pule kaba long 50% kam pat long kaba biang.
“Ki samla pule ka Meghalaya ki donkam la kumno kumno 85% ki seat. Ngim kwah ban phiah ïa ka hospital bad college hapdeng ki jingpynïaid kam bapher bapher ha kaba kan wanrah ka jingkulmar bad sngewthuh bakla. Kumjuh ki nongpang ki lah ban mad ka jingsiew ka bai sumar kaba heh dor da ka jingpyndonkam ïa ki machine kane ka juk da ki paralok shimet. Kumba la kdew lada ïa ka college la pynïaid da ki riew shimet ka jaka pule kan lah ban pynleit jingmut bha tang na ka bynta ka jingïoh jingmyntoi kaba bun ban ïa kaba ai ka jinghikai kaba bha tam ïa ki doktor ne ban shakri ïa ki paidbah,” ki la ong. Kine ki seng ki la phai ruh sha ka jingkren ba dangshen jong u Myntri Rangbah ka jylla u Conrad K Sangma ba 50% plus ne haduh 55% ki seat MBBS ha Tura Medical College yn buh bhah na ka bynta ki samla pule ka Meghalaya bad kine ki seat yn ai katkum ka bhah kam bhah jam ka jylla ne ka state’s reservation bad domicile policy, ba kynthup ïa ka notification vide No. PER.222/71/138 ka 12 tarik u Kyllalyngkot, 1972. Bad lada ka jingïakren pynbeit kan ïaid beit hadien habud ka sorkar ka lah ban kyntiew ïa ka seat reservation na ka bynta ki samla pule ka Meghalaya sha ka 60%.
“Ha kawei ka liang ha ka Expression of Interest (EoI) ba la pynmih da ka Directorate of Health Services (Medical Education & Research) ka la batai shai ba tang 50% na ki seat la buh kyrpang hapoh ka Government quota. Kane ka wanrah ka jingartatien ïa ngi. Kaei ka jingkren kaba dei kaba shisha? Bad balei la bhah tang 50-60% reservation haba kiwei ki jylla ki la bhah ïa ki samla pule ka jylla haduh 85% seat?” ki la kylli.
Kitei ki seng shuh shuh ki la pynpaw da kaba ong ba ka Tura Medical College ka dei ka medical college ba nyngkong eh ha ka jylla Meghalaya. Kadei ban ai ka nuksa ba ïa kane ka jaka pule doktor dei ban pynïaid da ka sorkar kumba long ka Assam Medical College, Dibrugarh, Assam.