Shillong, Nohprah, 06: Ka Maitshaphrang ka la rakhe ïa ka lyngkhuh sngi ïap ba 173 snem jong ka riewshlur ka jaidbynriew, ka Phan Nonglait da kaba kyntu ïa ka Sorkar Jylla ban pynbna noh ïa ka 6 tarik Nohprah kum ka “Phan Nonglait Day,” kata kum ka dak ka jingai burom ïa ka jingnoh synñiang bad ka jinglen lade bad ruh ban ai da ka khusnam kum ka dak ka jingleh burom na ka bynta jong ka.
Ka Maitshaphrang ka pynkynmaw ruh ba ka la pynlong ïa ki jingïalehkai drama ba la ai kyrteng, “Ka Drama jong ka Phan Nonglait” ha kiba bun tylli ki shnong ha ka nongbah Shillong bad ha ka shnong Nongkhlaw ha ki snem 1994-95, da kaba pynpaw halor ki jingnoh synñiang ki jong ka halor ka jingïaleh laitluid.
ïa ka kot kaba ïadei bad kane ka drama ruh la pynmih ha kaba ïa ka kyntien maitphang la thoh da u (L) Dr. Barrister Pakem uba dei u Vice Chancellor barim jong ka skulbah North Eastern Hill University.
Ka kot ba la ai kyrteng “Ka Phan Nonglait – A Lady Freedom Fighter of India” ba la thoh da u muktiar ka Supreme Court u Bah Daniel Stone Lyngdoh hadien ka jingwad bniah ïa kaba la don bynta ruh da u Salman Khurshid bad ïa kaba la pyllait paidbah ha ka 29 tarik u ïaïong 2022 ka la nang pynskhem halor ka jingdonkam kyrkieh ban ai ïa katei ka jingithuh.
Nalor kata ka Maitshaphrang ha u kyrwoh lyngba u Bah Michael N Syiem Convenor ka pynpaw ruh ba kine ki kam shlur jong ka Phan Nonglait ki aiñ mynsiem ïa ka jaidbynriew jong ngi mynta namar ka dei ka jaidbynriew rit paid kaba la shah kerkut da ki jaidbynriew kiba heh paid suda.
Kumta ka donkam palat ïa ka jingïatreilang kaba jan bha hapdeng ki kynthei bad ki shynrang khamtam ha ka bynta ban pyntreikam ïa ka Meghalaya Compulsory Registration of Marriage Act bad ban kyrshan ban pynlong aiñ noh ïa ka Equitable Distribution of Self Acquired and Ancestral Property.
Shuh shuh ka pynpaw ruh ba ki kam shlur jong ka Phan Nonglait ki pyni lynti ruh ba ha ka khim ha ka banse, sha ki jaka ba ki shynrang kim long shuh ban tur dei ki kynthei kiba lah ban rung haduh ki kamra ba thiah ki nongshun.
