Shisngi hadien ba u myntri ka tnad kam lum khajna ka jylla u James K Sangma u la pynbna ba la pyndam noh ïa ka aiñ khalai ne ka Meghalaya Regulation Gaming Act 2021, la mih pat bun ki jingdawa ba ka sorkar ka dei ban khot beit da ka Dorbar Kyrpang ban pyndam ïa kane ka aiñ hapoh ka ïing dorbar ym ban wanrah da ka Ordinance.
Hooid ka sorkar ka thmu ban pyntreikam shwa da ka Ordinance bad ynda la shong dorbar yn sa pynmynjur hapoh ka ïing dorbar kumba leh iakiweik iwei ki ain ba la pyndam noh . Hynrei kaba pynsheptieng ïa kiba bun ba lang ka long ba ka election ka la poi bad ym tip la kane ka sorkar kan dang wan phai ne em ha ka bor lada jia ba kam wanphai shuh bad wan da kawei kaba ym pyndam ïakane ka aiñ kata ka mut tang hadien hynriew bnai kane ka ordinance ka la iap noh bad kane ka aiñ MRGA 21 kan im biang bad treikam.
Hooid ym lah ban len dei ban ai ka jingïaroh ïa kane ka sorkar MDA kaba la sngap ïa ka sur u paidbah kumba la pynpaw da u Myntri Rangbah ka jylla u Conrad K Sangma ba kane ka sorkar ka dei kaba sngap ïa ka sur u paidbah. Ym lah ban len ka dei hi ruh kata namar naduh ka jingdawa pynkynriah ïa ki Harijan na them ïew Mawlong la shim khia da ka sorkar, halor ka jingdawa ban pyntreikam ia ka ILP la dep shim da ka resolution hapoh ka ïing Dorbar Thawaiñ bad phah sha Delhi hynrei namar ba kane ka kam ka shong ha ka kti jong kiba na Delhi kumta ka sahkut noh wat la ka don ka jingpyrshang ban leit bud dien na ka por sha ka por ruh. Nalor kata wat ka jingïa pynbeit pud bad ka Assam kaba ym lah da kiwei ki sorkar kane ka sorkar ka la leh.
Ym lah lait haba don ha ka shuki te ki jingkynnoh bad ki jingshah ther kin jur beit ha ki liang baroh khamtam lei lei ka jingkynnoh bamsap na u dewiong bad kiwei kiwei. Ki paidbah ym lah len ïa kata ki long thik kum ki nongpeit kai, lada u nongap kol u lah ban kem ïa shibun tylli ki bol bad lait ka jingshah thep bun kol lada u lait tang shikol ruh la kynnoh ba um ler bad kynnoh da kumne kumtai. Kumjuh ruh ka long kumta ïa ka sorkar lada ka leh bun ki kam ba bha hynrei haba don pat ki kam ba ka leh bakla ki paidbah ki ïohi tang ïa kata hi na kata ka daw sa mih bun ki jingkynnoh ïa kane ka sorkar.
Ha kaba ïadei bad kane ka aiñ ruh ka sorkar haba ka ïohi ïa ka jingpyrshah kaba mih na ki seng bhalang, ki dorbar shnong, ki nongïalam niam, ki paidbah ba ka sa rai ban pyndam noh ïa ka namar ka sngap ïa ka sur u paidbah. Dei ban ïaroh ïa kane ka jingleh jongka sorkar. Hynrei kaei kaba kiba bun balang ki dawa ba dei ban khot da ka dorbar ba kyrpang ban rai hapoh ka ïing dorbar ban pyndam ïa kane ka aiñ. Hooid ka por ka la khim bha ïaki MLA ba kin ïashong dorbar namar ki la bunkam sa tang sha ki constituency hynrei la ka long kumno kumno ruh ine i dei i kam ba tang shipor ar por kan bha hi lada ka sorkar ka khot da ka dorbar ba kyrpang khnang ban ym ïoh shim kabu kino kino ki seng saiñ pyrthei ban ïalam bakla ïa ki paidbah ha ka por election.Lada ym lum da ka dorbar kyrpang khlem pep kine ki seng khamtam ka Liang Pyrshah kaba shu kynthah sorkar beit kan ïalam bakla beit ïaki paidbah bad ki paidbah bapli kin ngop la ka ngop wat la kam long kaba shisha ruh.
