Nongpoh, Lber 27: Ha kum kane ka pyrthei kyrduh kam kyrduh jam ba bun ki khun samla ki shong khlem kam khlem jam, uwei u samla na ka shnong Umling ha Ri Bhoi District, mynta ka sngi u la mih ban pynpaw bad ban dawa na ka KHADC ba kam dei satia ban ai ia ki Trading bad Labour License sha ki bar jylla kiba thmu ban bsuh khlieh ha ki kam khaïi pateng, kiba dei ki kam kiba dang lah ban trei da ki samla trai jylla.
Une u samla u dei uba la tip kyrteng kum u Shanbor Marbaniang na ka Shnong Umling bad kum u samla u la hap ban kren ia kane ka phang, ka dei hadien ba wat ia ki kam kiba dang lah ban trei da ki samla trai jylla la wan ban bsuh khlieh da ki bar jylla kiba khlem da ioh bor na ki bor ba dei peit ka sorkar.
Hab ia kren bad ki Nongthoh Khubor, u Samla Shanbor Marbaniang, u la iathuh ba kum u samla u la pyrshang ban plie ia kawei ka dukan ban thied ia ki marjot ba wan poi na kylleng ka thaiñ Ri Bhoi, hynrei wat ia kane ka kam ki bar jylla na Assam ki wan poi sha Ri Bhoi ban thied ia ki mar jot kaba pyniap kylla pat ia ki samla trai jylla kiba trei ia kane ka kam.
U la iathuh ruh kine ki jaid kam kiba u la seng ki dei ki jaid kam ba dang lah ban leh da ki trai jylla bad kaba sngewsih ka long ba ki bar jylla na Assam ki wan rung sha Meghalaya khlem da don ka Trading bad Labour License bad wat na ka bor shnong ki rung da ki Kali ban thied ia ki mar jot mar pei kiba la ktah kylla ia ki samla trai jylla.
“Kaba kham sngewsih ka long ba don na kitei ki bar jylla kiba ju buaid bad dih drok ha kaba ki rung sha ki shnong ki thaw kaba long ka jingma ia ki kynthei ki khynnah bad ym lah ruh ban tip ioh ki leh ia ki kam sniew kaba dei namar ka jingbym don kata ka jingteh jingkhum ia ki ban wan bsuh khlieh ha kitie ki kam” ong u samla Shanbor Marbaniang.
U la ong ruh ba katei ka jaid kam ka dei kaba dang lah ban leh da ki samla trai jylla bad lada ailad ia ki briew kiba wan na shabar ka jylla, kane ka pyniap jakpoh ia ki sasmla kiba don kata ka mynsiem ban seng kam seng jam bad ban ieng ha la ki jong ki kjat.
Namarkata, kum u Samla u la kyrpad jur ia ka Khasi Hills Autonomous District Council ba ki hap ba pyrkhing da kaba pynlong ia ka jingkhynra ia ki dukan ki bar jylla kiba wan ban seng kam seng jam bad ym tang katta ka la dei ruh ka por ba ka KHADC kam dei ban ai ia ka trading bad Labour License ia ki bar jylla kiba wan trei ia ki kam ba dang lah ban leh da ki samla trai jylla, u la bynrap.
