Shillong, Iaiong 03: Ka Dorbar Shnong Diengpasoh Pyllun mynta ka Lah Sngi U Blei, ka la dawa na ka seng Hynniewtrep Achik National Movement (HANM) ba kadei ban pan map bad ban pynshai ïa ki jingkynnoh kiba la pynthobria ïa ka shnong.
U Deputy Sordar ka Diengpasoh Pyllun Bah Seibor Sana ula ong, ka jingkynnoh ka seng HANM ka long tang ka jingpynthohbria ïa ka nongïalam shnong bad ïa ka shnong baroh kawei bad kaba ïalam bakla ruh ïa kiba bun balang.
“Haba phi kam ïalade ba phi ïeng na ka bynta ka jaidbynriew kan eh aiu ban ïakren shwa bad ka Dorbar Shnong shwa ban pynmih ïa ka khubor ban kynnoh da kumne kumtai. Phi kren ïa kaba phim tip, phi hap ban pan map ha ki lad pathai khubor bad ban pynshai ïa ki jingkynnoh ki jong phi khnang ba ka jaidbynriew kaba tang shi troh kan ym sngewthuh bakla” ong u Bah Seibor haba ïakren bad ki nongthoh khubor hynne ka sngi.
Katba u Sordar Shnong ka Diengpasoh Pyllun Bah Louis Mukhim, ula ong ka HANM Shilliang- Umkhen Circle hapoh ka jingïalam u Bah L Kharbani, kala kynthoh pyrshah ïa u Sordar Shnong kumta ki la shim ïa ka rai ban mih shakhmat ban pynshai paidbah halor kitei ki jingkynnoh.
U Bah Mukhim ula ong ba u Sordar um long halor ïa ka Dorbar Shnong bad kam long kaba ïahap ban kynnoh ba u Sordar u kheiñ nongwei ïa kiba nabar shnong bad ïa katei ka ktien ym ju pyndonkam ruh hapoh ka dorbar shnong.
“Ka Diengpasoh ka dei ka ri Raid bad ym lah ban die ïa ki jaka shabar shnong, ïa ki jaka shimet la shah ban ïadie ïathied hynrei dei ban pyntip pat ïa ka shnong bad kano kano ka jingthied khlem ka jingtip ka shnong ka dei ka bym lah ban pdiang” ong u Bah Mukhim.
Haba pynrem jur ïa ka jingkynthoh ka HANM, ula ong ba ka shnong ka don ka jingïadei bad baroh ki sengbhalang bad kam ju mih satia kano kano ka jingeh ne jingbym ïasngewthuh jingmut bad kiwei pat ki sengbhalang namar ki ïa burom bad ïatreilang naka bynta ka bha ka miat.
. “Ngi kwah ïa ka jingpynshai ba mynno ka shnong kala die ïaka jaka sha ka Airport bad lada leh ïa katei ka kam ruh ka dei na ka bynta ka jingmyntoi ka shnong bad ka jylla hi baroh. Ngi kwah ban pan jingpynshai naka HANM ba mynno ka shnong kala die ïa ka jaka namar haduh mynta kam pat don kum kata ba ngi lah die jaka sha ka Airport” ong u Sordar.
