Nongpoh, Naitung, 04: Ki paidbah jong ka Raid Marwet mynta ka sngi kila mih shakhmat ban dawa naka Hima Mylliem ban thung bad jied ïaki Rangbah Shnong Pyllun da ki briew kiba dei ki trai jong ka Raid Marwet, kiba peit bad khmih ïa ki shnong kiba la long Rangbah Shnong da ki Garo hadien ba ka Hima Myliem bad ka District Council kila dep ban pynbeit ïaka kam haki shnong ba long Rangbah Shnong da ki Garo namar bala mih ka jingpyrshah ïaka jinglong Rangbah Shnong ki Garo hapoh ka Raid Marwet.
Haba kren sha ki lad pathai khubor mynta ka sngi, katto katne ki riew paidbah naka Raid Marwet kiba don ka jingkitkhlieh halor ka kam Rangbah Shnong Pyllun, ba ka Hima Mylliem kala rai ban jied ba kynthup ïaka Byrnihat Pyllun, Narbong Pyllun, Baridua Pyllun bad ka Umtyrnga Pyllun kila pynpaw ba kim kwah ba ka Hima Mylliem kan jied da ki briew kiba nabar jong ka Raid hynrei ki Rangbah Shnong Pyllun ki dei ban long ki trai muluk jong ka Raid Marwet ban shimti ïaka kam synshar khaddar.
Ki la ong ruh ba ki don shibun ki ki khun ki hajar jong ka Raid Marwet kiba lah ban shimti ïa katei ka kam namar kim kwah ba kiwei kiba nabar kin shimti ïaka kam synshar khaddar hapoh ka Raid Marwet, hynrei ki trai napoh ka Raid Marwet kin shimti ïa katei ka kam bad kyrpad sha ka Hima Mylliem ban sngew ban sngap ïaka jingkyrpad jong ki khun ki hajar jong ka Raid, ha kaba kila pynpaw ba kim don kano kano ka jingsngewpher jaitbynriew hynrei ban shimti hi ïaka kam synshar khaddar ki dei ban long ki trai Marwet namar kitei ki shnong ki dei kiba hap hapoh ka jingpeit jingkhmih ka Raid Marwet.
Na ka liang u Syiem ka Raid Marwet u Paiem Ken Syiem u ong ruh ba naka liang ki paidbah ka Raid Marwet kila kyrpad ruh sha u ban thung Rangbah Shnong Pyllun da ki briew kiba dei naka Raid Marwet, hynrei naka liang jong u la pynpaw ba um lah ban leh eiei namar katei ka dei ka kam jong ka Hima Mylliem.
