Dawa ki MDC TMC ban pynshitom ïa ki ophisar ba donkti pynpra ïa ka World War I Cenotaph

Shillong, Lber 21: Ki MDC ka liang pyrshah ka TMC ha ka sngi Palei ki la dawa ba dei ban pynshitom ïa ki ophisar sorkar kiba donkti ban pynpra ïa u Mot Sahnam ka World War I Cenotaph.
“Ngi dawa ïa ka hok halor kane ka jingleh ba ktah ïa ka kolshor bad ngi kyntu ïa u Myntri Rangbah ban sdang ïa ka jingshim kam pyrshah ïa ki ophisar sorkar kiba la leh bym hok ïa ki paidbah Garo da kaba ki la leh ïa kane ka kam kaba ktah ka jingsngew ki Garo,” ïathuh ki MDC ka TMC.
Kine ki MDC ki la leit ruh ban jngoh ïa kane ka jaka kaba la tei ïa ka World War I Cenotaph kum ka dak jingkynmaw burom ïa ki longshwa manshwa ki paid Garo bad ki la ong, “Ngi pyrshah bad ngi pynrem ïa kum kine ki kam ba khlem pyrkhat jong ka sorkar Meghalaya. Ngi pynrem jur ïa ka jingbym don ka jingmut jingpyrkhat bad ka jingpynpra kaba beaiñ ïa kine ki jingtei sahnam kaba dei halor ka World War I Cenotaph.”
“Kane ka jingpynpra kam dei tang ka jingthombor ïa ka jinghiar pateng jong ngi hynrei ka jingi beiñ ïa ka jingbuh jingkynmaw jong ngi ïa ki longshwa manshwa. Katba ngi mynjur ba kum kane ka jingleh bad ki sienjam ba la shim dei ban sdang ban pynneh pynsah ïa ki jingtei kiba la rim tam, hynrei dei ban leh pat khlem da pynpra ïa ki jingtei ki mynbarim kiba la long naduh mynshwa,” ki la bynrap.