Shillong, Lber 21: U Myntri ka sorkar jylla uba khmih ïa ka tnat Animal Husbandry & Veterinary u Bah AL Hek ha ka sngi Thohdieng, u la pyntip ba ka Sorkar kan shim hakhmat eh ban tei ïa ka Veterinary Hospital ba thymmai ha Upper Shillong.
Halor kane haba ïakren sha ki lad pathai khubor u Bah Hek u la ong ba ki don 2-3 tylli ki jingtyrwa ba la phah sha ka tnat Planning ka Sorkar Jylla halor kane ka kam.
U la ong, “Ka tnat Planning ka la buh jingkylli halor kane bad ka tnat Animal Husbandry ka la pyndep ïa la ka kamram ban jubab hapoh ka Ïingdorbar ba dang shu dep ka dorbar mang tyngka. Ngi la kdew shai ba ka jaka sumar mrad kaba thymmai yn tei ha Upper Shillong. Ïa kane ka mat la don ruh ha ka jingkren mang tyngka, kumta ngi hap ban shim khia bha ïa kane ka kam.”
Haba ïadei bad ka kam khaïi masi tuh, u Bah Hek u la iathuh ba u la ïohi da la ki khmat ïa 2-4 tylli ki case ha Jaiñtia Hills bad East Khasi Hills ha kaba ki BSF ki la ïoh kurup ïa ki masi beaiñ bad kila aiti noh sha ki pulit.
Hynrei ula ong ba ki briew ki leh ïa ka kam khaïi bad kumno yn khanglad ïa ka.
“Hooid, ngam kyntait ïa kane ka jingshisha hynrei kata ka shong ha ki nongkhaïi namar ki nongkhaïi ki leh ïa kine baroh dei namar kata ki pulit bad ki BSF ki long kiba husiar ban peit bniah ïa kane ka kam khaïi masi tuh,” u la bynrap.
