Nongstoiñ, Nailar 19: Ka jingbym don ki surok kiba biang ha ka thaiñ rimen sepngi kiba hap ha ka Hima Rrambrai ba kynthup ïa ki 16 tylli ki shnong ka Mawdet, Mawkhiat, Uma, Umshem, Rynñiaw, Mawiong, Domkyrkoh, Mainop, Mawshad, Marwa, Mawlongbah, Pungphreit, Stepwan Mawkhiatmihngi bad kiwei kiwei ki shnong, ka la pynlong ïa ki paidbah jong kitei ki shnong ba kin ïakynduh shibun ki jingeh ha ka leit ka wan, ka kit ka bah bad kiwei kiwei khamtam eh ha kaba kit ba bah ïa ki jingdonkam ban pynpoi ha kitei ki shnong.
Ki Nongialam jong ka Synjuk Ki Rangbah Shnong Rimen Sepngi 18 Shnong Area haba ïakren bad u nongthoh khubor mynta ka sngi, ki la ïathuh ba kitei ki shnong ki dei kiba jngai bha na ki jaka ba la don surok, ha kaba hap ban ïaid da ka kjat da ki bun bun kynta.
Ki la ong ruh ba ha ka por lyiur lei lei haba don kiba pang ba shitom la hap ban shu kit da u briew bad ka shim por lai haduh saw kynta haduh ban da poi ha ka jaka sumar kaba don ha Rambrai. Kitei ki rangbah ki la ïathuh ruh ba ki don ki shnong kiba hap ban ïaid kjat haduh hynriew kynta kum na Umshem, Mawpayir bad kiwei kiwei ki shnong kiba kham jngai.
Ki nongïalam ka synjuk ryngkat ki paidbah jong kitei ki 18 shnong, ki la dawa na ka sorkar MDA ba la ïalam da u Conrad Sangma, ba kan sngewbha ban thaw ki lad ki lynti ban pynpoi surok sha katei ka thaiñ, namar ba ka surok ka ban sa pyntrei na Nongstoiñ sha Kyrshai kam ïaid lyngba ïa kitei ki shnong. Kumta ki paidbah ki hap ban mad ïa ki jingeh baroh shilynter jingim.
Ki la ïathuh ruh ba ki shnong ha katei ka thaiñ ki dei kiba pynmih bun bha ki mar rep kum u synsar, ki soh ki pai ki jhur ki jhep bad kiwei kiwei ki mar rep. Kumta ka shem jingeh haduh katta katta ha ka kit ka bah ban pynpoi sha ki ïew ki hat na ka bynta ban pynïaid ïew.
Ki Nongïalam jong katei ka synjuk ki la ong ba halor ka jingdawa jong ki ban pynpoi surok, kin sa pynlong biang ïa ka jingïakynduh lang ban ia phylliew jingmut na ka bynta ban leit ïakynduh ïa ki bor sorkar ba kin thaw ki lad ki lynti ban pynïoh surok ha katei ka thaiñ. Ki la kyntu ruh ïa u MLA ka Rambrai Jyrngam ban un shimkhia lem ban pynsngew sha ka sorkar halor katei ka jingdawa jong ki khnang ba ka sorkar kan shimkhia.
