Shillong, Naitung, 03: Ki samla kiba la pyndep ïa ka eksamin Meghalaya Teachers Eligibility Test (MTET) kiba don hapoh ka shatri jong ka Meghalaya MTET Qualified Association ha ka sngi Balang ki la dawa ïa ka tnat Pule Puthi jong ka Sorkar Jylla ba ka dei ban pynstet noh shaid shaid ha kaba ïadei bad ka thungkam thungjam ha ki post kiba thylli ha ki skul Lower bad Upper Primary hapoh ka Jylla baroh kawei.
Ha kaba ïadei bad kane, ka Association ka la ïakynduh ruh ïa u Myntri ka tnat Pule Puthi ka Sorkar Jylla u Bah Lahkmen Rymbui bad ïa u Director jong ka School Education and Literacy u Ambrose Ch. Marak da kaba aiti ruh ïa ka dorkhas.
Ka Association ka la dawa ruh ba ka tnat Pule Puthi ka dei ban pynlong noh mardor ïa ka interbiw shwa ban pynlong ïa ka eksamin MTET ba thymmai bad ban jied ïa ki kyrtong kiba la shah jied katkum ki kyndon ba la pynmih da ka sorkar jylla khlem da don kano kano ka jingleh tuh.
Ka Association ka la pyntip ruh ba katto katne ki samla kiba la pyndep ïa ka MTET ki dei kiba la kut ka rta wad kam sa tang khyndiat bnai katba ki don pat katto katne kiba la dep kut ka rta wad kam.
“Namarkata, dei ban pynlong noh mardor ïa ka jingthungkam khnang ba kan ym ktah ïa ka rta wadkam jong ki samla kiba dei hok ban ïoh ïa ka kam ka jam,” ong ka Association.
Ka Association ka la pyntip ba u Myntri ka tnat Pule Puthi um shym la ai ïa kano kano ka jingkular bad halor kane ka Association ka la rai ban ïakhun beit haduh ban da pynurlong ïa ka jingdawa.
