Dawa ka KSU/FKJGP ban pyntreikam ïa ka Roster shakhmat
![](https://mawphor.com/wp-content/uploads/2022/07/mawphor-1.jpg)
Shillong, Jymmang, 18: Ka Khasi Students Union (KSU) bad ka Federation of Khasi Jaiñtia and Garo People (FKJGP) ha ka sngi Palei ki la dawa ïa ka Sorkar Jylla ba ka dei ban pyntreikam ïa ka Roster System shakhmat ym ban pyntreikam shadien.
Haba phah ïa u kyrwoh sha baroh ki politishian ki ban sa ïashim bynta ha ka jingïalang jong ki seng saiñ pyrthei ba la khot da ka sorkar MDA lashai ka sngi ban ïatai halor ka Roster System, ka KSU ka la ong, “ka jingmih jong ka Roster System kumba paw hi ka dei namar ka jingbthah jong ka High Court of Meghalaya ïa ka Sorkar Jylla. Hynrei kaba sngewsih pat ka long ba ka Sorkar Jylla haba pyntreikam ïa kane ka Roster System ka la kyrtiang biang shadien da kaba wanrah ïa ka jingbym biang ïoh kam ki Garo katkum ka bhah 40:40 katkum ka jingujor katto katne tylli ki kynhun sengbhalang na Garo Hills, bad bsut ïa kane ha ki jingthung kam kiba mynta kiba la ktah shibun eh ïa ki samla wad kam Khasi namar ka jingïoh bhah ki Khasi mynta kam dei shuh 40% hynrei ka la hiar shuh shuh.”
“Hooid lada kheiñ wat na ka ‘population ratio’ ruh ka bhah 40:40 ka la pynduhnong bha ïa u Khasi namar ka jaidbynriew Khasi ka kham heh paid ban ïa ka jaidbynriew Garo hynrei ka jingkyrtiang dien (retrospective) ïa ka Roster System ka la buh jingeh arshah ïa ki samla Khasi ba mynta namar kim ïoh pura shuh wat tang ïa ka bhah 40%,” ong u kyrwoh ba la phah da u General Secretary ka KSU u samla Donald V. Thabah.
“Ka KSU ka kyntu ïa baroh ki politicians Khasi ba ki dei ban pyrshah beit ïa ka jingpynphai dien ïa ka roster system bad dawa ba dei ban pyntreikam beit shakhmat (prospectively),” ong u kyrwoh.
“Shuh shuh lada ka Sorkar ka sngew ba ka jingphai dien ïa ka Roster System ka dei ban pyndap ïa ka jingduhnong ki Garo naduh u snem 1972, ka long pat kum ka jingpynshitom, ka jingpynsaja bad ka jingtei pop ïa ki samla Khasi kiba wad kam mynta. Tang namarba phi sngew ba kiba mynshwa ki la bakla ym dei pat ban pynshitom (punish) ïa ki samla Khasi mynta kiba luilui ki bym don bynta eiei ha ki jingjia ba mynshwa hynrei kiba kwah tang ban ïoh ïa la ka hok ka bhah ha ki kam sorkar,” la bynrap u kyrwoh.
“Kyntang ïa wai ka KSU ka dawa ïa ka Sorkar MDA ba ïa ka Roster System dei ban pyntreikam shakhmat naduh ba la pynmih ïa ka bad ym ban phai shadien kaba long kum ka jingïohnong ïa kawei ka jaidbynriew bad ka jingduhnong kaba khraw ïa kawei pat ka jaidbynriew,” ong u kyrwoh.
Na ka liang jong ka Federation of Khasi Jaiñtia and Garo People (FKJGP) Sengkmie ka la dawa ïa ka sorkar MDA ba ka jingpynbeit thymmai ïa ka Roster System ka dei ban long katkum ka jingbun paid (population ratio) khnang ba ki khun samla kin ym kylla langknia ban ïoh ïa la ka hok ka bhah ha ki kam sorkar.
“Ka FKJGP kum kawei na ki sengbhalang kaba don ïa ki dkhot jong ka ha baroh kawei ka jylla kaba la ai ïa ka jingshakri jong ka mynta la palat 33 snem kynthih ka dap da ka jingbynñiaw ban ïohi ïa ki jinglong jingman halor ka jingpyrshang jong ka Sorkar Jylla ban kyrtiang dien pynban naduh u snem 1972 ban pynbeit thymmai ïa kata ka Roster System hadien ba la mih ka jingbthah na ka Iingkashari badon burom jong ka jylla Meghalaya,” ong u kyrwoh ba la phah da u Vice President ka FKGJP u samla Kitboklang Nongphlang.
“Ka FKJGP ka kyntu jur ïa baroh ki seng saiñpyrthei kiba don hapoh jong ka jylla Meghalaya ba kim dei shuh ban dang kyrtiang dien ïa ki 50 snem kiba la leit noh hynrei ban saiñdur thymmai ïa ki 50 tylli ki snem ki ban sa wan lada ki don shisha ka jingkitkhlieh bad ka jingïohi jngai. Ka FKJGP ha kajuh ka por ka kyntu ruh ba baroh ki seng saiñpyrthei ki ban leit sha katei ka jingïalang lashai ka sngi ba kin shim ka jingkitkhlieh ba ka tarajur kam dei satia dei ban noh shiliang,” la bynrap u kyrwoh na ka Seng.
“Ha kajuh ka por ka FKJGP ka dawa ïa ka Sorkar Jylla ba ïa ka Roster System dei ban pyntreikam shakhmat naduh ba la pynmih ïa ka Hukum lane kata ka jingbthah jong ka Iingkashari badon burom jong ka jylla Meghalaya bad ym dei satia ban dang phai dien trai,” la bynrap u kyrwoh.