Shillong,Iaiong 4 : Ka Khun Hynniewtrep National Awakening Movement (KHNAM) mynta ka Sngi Ba Ar ka la dawa ïa u Lat ka jylla u Phagu Chauhan ban khot ïa ka Dorbar ba kyrpang ban ïatai sani bha halor u snem ban pyntreikam ïa ka Roster System ha ka jylla.
Ka KHNAM ka la dawa ïa kane hadien ba ka ïing bishar High Court (HC) jongka jylla ka la pynwai noh ïa ka mukotduma PIL ryngkat bad ka jingai jingmut ba ïa ka rai na ka bynta u snem ban pyntreikam ïa ka Roster dei ban ïatai sani bha ha ka ïing Dorbar Thawaiñ ka jylla bad shim rai da ka Liang Synshar bad Liang Pyrshah.
“ Kumta na ka bynta ka jingmyntoi lang jong ki paidbah ngi dawa ba u Lat u dei ban khot noh da ka Dorbar ba kyrpang kat kum ka artical 174 jongka Riti Synshar ka ri India khnang ba ki nongmihkhmat kin ïoh ban ïatai sani bha hapoh ka ïing Dorbar ïa kane ka kam” ong u Vice President ka KHNAM u bah Thomas Passah.
U la ong ka ïing bishar HC ka la kren shai kdar ba kane ka kam ka dei ban ïatai sani bha ha ïing dorbar.
U la ong, ha ka Dorbar Mang Tyngka kaba la dep u Lamphang ka ïing Dorbar um shym la ailad ban ïatai ïa kane ka kam bad kane ka pynpaw shai kdar ba ka sorkar MDA-1 bad MDA-2 ka ïaleh katba lah ban pynthikna ba ka Reservation Policy jongka jylla bad ka Roster System ka dei ban ïoh jingmyntoi tang jongkawei ka jaidbynriew ym ïa baroh ki jaidbynriew hapoh ka jylla.
“ Naduh ba la pyntreikam ïa ka Reservation Policy ka la don ka jingleh shilliang khmat ïa ki paid Khasi bad Jaintia” kynnoh u bah Passah.
U bah Passah u la pynpaw ba naduh ba la shim ïa ka Resolution halor ka Reservation Policy ha ka 12 tarik Kyllalyngkot 1972 la kren shai kdar ba ka jingbhah kam ka dei ban pynshong nongrim na ka jingbun paid ki jaidbynriew kumta ka jingai bhah 40 % ïa ki paid Garo bad 40 % ïa ki paid Khasi bad Jaintia ka la long lypa kaba pynkheiñ ïa ka kyndon jongka Reservation Policy.
U la ong kat kum ka Khanasamari 1972 ka jingbun paid ki paid Khasi bad Jaintia ka long 4,88,350 katba ki paid Garo ki long tang 3,25,872 kumta ka jingai bhah mar 40 % kam long kaba dei hok bad ka la dei ka jingpynkheiñ ïa ki kyndon ka Reservation Policy.
Nalor kata, une u Nongïalam ka KHNAM ula kynnoh ba ka bhah jong ki paid Garo la shah ban rah sha kiwei pat ki snem (carried forward) ba bud ha kiba bun ki khep.
“Ha ka jingshisha, la shah ban rah tang shisnem kat kum ka jingpynbna O.M PER/222/71/141 ba 20 Iaiong 1972 hynrei ïa ka bhah ki paid Garo la shah ban rah pat sha uwei u snem kaba long haduh 3 snem lynter kat kum ka jingpynbna O.M PER(AR)/654/79/15 bala pynmih ha ka 12 Nailur 1979” ong u Bah Passah.
“Ka Sorkar Jylla kat kum ka jingpynbna O.M PER (AR)/654/79/15 bala pynmih ha ka 12 Nailur 1979 kala shah ban thung kam kyrpang ïa ki paid Garo. Kane kam kut hangne, nalor kata ka O.M PER 222/72/163 ba 28 Jymmang 1974 kala shah ba ka 40% ka bhah ba la ai sha ki paid Garo ba kan treikam ruh sha ki kyrtong ki bym dei ki paid Garo bad ki kyrtong kiba dei na shabar ka Jylla” ula bynrap.
Kat kum ka jingong jong u, kane ka kyndon jong ka Reservation Policy ka dei kaba la pynïaid bakla la bunsien ïa kaba la ïohi ba kam long satia tang ka jingle bym hok ïa ki paid Khasi bad Jaintia hynrei ka jingpynkheiñ ïa ka Policy hi”.
