Jowai, Jymmang 01: Ka Jaiñtia Students’ Union (JSU) Jowai Circle mynta ka sngi 1 tarik u Jymmang hapoh ka jingïalam u President, samla Borntifulson Rupon kila leit jurip ïa ka surok Urkhla kaba ïaid sha ka jaka pyllang umbam (Water Treatment Plan) jong ka tnad P.H.E Electrical Division Jowai.
Ka seng ha ka jingtohkit bniah la lap ba katei ka surok ka hap hapoh ka jingpeit jong ka tnad PHE Electrical Division, hynrei la eh sah ïa ka khlem don shuh ba maramot da ki phew snem mynta bad ka la don hapdeng ka jingjulor bad ki jingsniew shaba palat.
Kiba bun na ki nongshong shnong kiba sah sha kitei ki liang jong ka surok bad ïa kiba leit trei sha ka jaka pyllang umbam (Urkhla) kila mad shibun ki jingeh khamtam ha ka por slap namar ka jingktieh jong ka surok.
Halor kane ka seng ka pynpaw ka jingsngewkhia ban ïohi ïa katei ka surok hapdeng ka jingjulor bad ka jingdap ktieh, da kaba ong ‘kumno wat hapoh ka sor Jowai dang don kum kitei ki surok ba shah eh beiñ bad kiba la sniew shaba palat, kumno pat ïa ki surok kiba don sha kiwei de ki jaka’ ba buh jingkylli ka seng.
Na ka liang ka JSU Jowai Circle ka kyntu jur ïa ka tnat P.H.E bad khamtam ïa u MLA ka thaiñ ba kin leh noh mardor ïa kaba donkam na ka bynta katei ka surok, khnang ban long ka jingmyntoi ïa kitei ki nongshong shnong ka thaiñ.
