Dawa ka HYC ïa ka Sorkar ban pynkha sa kawei ka State University ba thymmai ha Shillong

Shillong, Nailar, 08: Ka Hynñiewtrep Youths Council, Central Body ha ka sngi Baar ka la aiti da ka jingthoh ha u Myntri ka tnat Pule Puthi jong ka sorkar Jylla u Rakkam A. Sangma ban dawa ïa ka Sorkar ba ka dei ban plie noh sa kawei ka State University ha nongbah Shilllong.
Ha kajuh ka por ka seng ka la dawa ruh ïa ka Sorkar ban plie noh ïa ka Shillong Campus ynda la pynsdang ïa ka Captain Willamson A. Sangma University ha rilum Garo.
Ha ka jingïakren bad ki lad pathai khubor, u President ka HYC u Bah RobertJune Kharjahrin u la ong, “ngi dawa ban buh noh ïa ka State University hapoh Shillong bad na ka liang u Myntri u la ong ba kane ka kam ka dang don hapdeng ka jingthmu ban ïakren bad u Myntri Rangbah ka jylla bad ïa ka kynhun Myntri bad ngi la dawa ban pyntreikam noh ïa ka Captain Williamson A. Sangma University bad ngi la dawa ban buh ïa ka Regional Office jong kane ka skulbah hapoh ka thaiñ Khasi-Jaiñtia.”
U la ïathuh ba ka jingpynkhreh ban thung ïa u Vice Chancellor bad ïa ki Pro-Vice Chancellor ka la ïaid shakhmat bad u la pyntikna ba ha u snem ban sa wan, yn sa pyntreikam noh ïa kane ka skulbah bad ka Shillong ruh kan sa don ïa la ka jong ka ophis treikam ha kaba ïadei bad kane ka skulbah,” ong u Bah Kharjahrin.
Ka HYC ka la pynsngew ruh hakhmat u Myntri halor ka jingrem ka bai skul. “Ngi la dawa ba la donkam ban pynïaid ryntih noh ïa ka bai skul da ka Sorkar khamtam ha ki skul ba ïoh jingïarap na ka Sorkar bad ha ki skul jong ki riewshimet namarba kane ka la ktah shikatdei ïa ki khynnah skul bad ïa ki kmie ki kpa. Halor kane, u Myntri u la ong ba un sa shimkhia halor kane.”
“Kane ka ktah haduh katta katta ïa ki longïing longsem bad ka jingkiew than ka bai skul ka dei kawei na ka jingkiew kiba pep skul shiteng por,” la bynrap u Bah Kharjahrin.
Ka HYC ka la dawa ïa u Myntri ka tnad Pule Puthi ban ai jingïarap ïa ki kolej bapher bapher, ban buh ïa ki ‘Centre’ thoh eksamin CUET hapoh ki district jong ka jylla bad halor kane u Myntri u la ong ba ha u snem 2024, ka jylla kan sa ïoh saw tylli ki ‘Centre’ thoh eksamin CUET ha kaba ar tylli kin don ha Shillong, kawei ha Jowai katba kawei pat ha Tura.
Ka Seng ka la dawa ruh ban wanrah ïa ka sobjek Aptitude bad ka Logical Reasoning ha ki skul khnang ba ki khynnah skul kin long kiba la pynkhreh ha ki eksamin bapher bapher.
“Ngin sa phah ïa ka jingai jingmut sha ka State Education Commission,” ong u Bah Kharjahrin bad bynrap, “ngi la pynsngew ruh hakhmat u Myntri ba ka Sorkar ka dei ban shimkhia halor ka jingshah ktah jong ki 200 ngut tam ki samla pule napoh ka jylla Meghalaya na ka jingïaumsnam ha ka jylla Manipur.”
Ha kane kajuh ka sngi, ka HYC Ri Bhoi Sepngi Circle ka la pynsngew ruh ha u Myntri ka tnad Pule Puthi halor ka jingdawa ban pyntreikam noh ïa ka Patharkhmah Model Degree College.
U President ka HYC Ri Bhoi Sepngi Circle, u Bah R.C Thangkhiew u la ong, haduh mynta ka Sorkar kam pat plie satia ïa ka Patharkhmah Model Degree College kaba don hapoh ka shnong Patharkhmah, Jirang Block watla ïa ki jingtei jong ka kolej la pyndep lut.
“Ngi kyrpad ïa ka Sorkar ba kan plie noh ïa kane ka jaka pule khnang ba kan long ka jingmyntoi ïa ki paidbah kiba dei na ka thaiñ bad khamtam eh ïa ki samla kiba wan na ki longïing longsem kiba duna ha ka ïoh ka kot,” ula ong.
U la pyntip ba u Myntri u la ai ka jingkular ba ha u snem 2024 yn plie noh ïa kane ka shlem pule.