Khliehriat, Nailar, 20: Ka Hynñiewtrep National Youth Movement East Jaiñtia Hills District myn ha ka 17 tarik mynta u bnai ka la leit ban buh da ka jingthoh ha khmat u Deputy Commissioner bad ka la dawa ba donkam ban don noh ka District Auditorium, Library bad ka Coaching class ha East Jaiñtia Hills District, haba kren halor kane ka jingdawa ka seng ka la ong ba ka por ka la ïaid mynta haduh 11 tylli ki snem jong ka jingïoh district ba pura, kumta donkam ban don kane ka Auditorium khnang ban ïoh long kum ka jaka ban pynlong ïa ki jingialang bapher bapher jong ka sorkar ha kane ka jaka.
Ka seng ka la pynpaw ruh, ba lada don kane ka hall Auditorium kan iarap shibun bad ka jingdawa ban don ka Library bad ka Coaching Class ka ka lah ban ïarap na ka bynta ban pynkhreh ïa ki exam kum ka DSC exam, ka MPSC exam bad kiwei kiwei ki exam, kine ki jingdawa ki long bynta ka jingmyntoi ki khun ka district, pynkut u kyrwoh na u General Secretary HNYM East Jaiñtia Hills District, u bah Khmihbha Phawa.
