Dawa ka FKJGP ïa ka Sorkar MDA kan bishar bniah biang ïa ka MoU pynbeit pud ka Meghalaya-Assam

Nongstoiñ, Lber 31: Ka jingshah kem jong ki ar ngut ki nongshong shnong jong ka Malchapara ha ki pulit ka Assam bad ka jingshah thwet jong ki arphew san ngut kiwei pat, ba kynthup ïa lai ngut ki longkmie, ka dei na ka daw jong ka jingbym ler jong ka sorkar MDA I ha kaba ïadei bad ka jingpynbeit ïa u pud u sam ha ka wat kaba nyngkong, ong ki nongïalam ka Federation of Khasi Jaiñtia & Garo People West Khasi Hills District.
Ha kaba ïadei bad katei ka jingjia, u bah Chandra Nongdkhar President ka FKJGP West Khasi Hills, haba ïakren bad ki nongthoh khubor mynta ka sngi ha ophis treikam jong ka seng ha Nongstoiñ, u la ong ba ka sorkar kam shym la kheiñ kor satia ïa ka kaiphod ba la phah da ka Regional Committee jong ka West Khasi Hills.
U la ong ba hadien ba ka la leit ban sngap ïa ka sur jong ki paitbah nongshong shnong ha khappud, ha shuwa ban ïasoi ïa ka soskular pynbeit pud, ki ar ngut ki Myntri Rangbah kata u Himanta Bisaw Sarma jong ka Assam bad u Conrad Kongal Sangma jong ka Meghalaya, ki la leh ha la ka jong ka mon bad dei halor katei ka nongrim, ba na ka liang jong ka seng ka dawa ïa ka sorkar MDA II, ba kan bishar bniah biang sa shisien na ka bynta ban wan rah ïa ka shong suk shong saiñ.
Utei u nongïalam ka seng u la ong ruh ba ka seng ka sngewkhia jur ha kaba ïadei bad ka jingbym nud shuh jong ki arphew san ngut ki nongshnong shnong ka Malchapara, ban leit sha la ki ïing ki sem bad ki la hap ban leit sah noh ha ka ophis jong ka hima Nonglang Sirdarship ha Langdongdai, tang namar ka jingsheptieng ïa ka jingshah thwet ha ki pulit Assam.
U la ong ba ka seng kam lah ban shu sngap halor katei ka jingeh ba ki paitbah nongshong shnong ha khappud ki ïakynduh. Ka seng kan kyrshan bor bah ruh halor ka jingthmu jong ki paitbah na kitei ki shnong khappud, ban pynlong ka jingïakhih ha kine ki sngi ban wan ha nongbah Shillong.
Nalor kata ka seng ka la dawa ruh na kane ka sorkar MDA II ba ha shuwa ba kan sdang ban pynbeit pud ha ka wat kaba ar, ka dei ban lum lang ïa ki syiem,ki sordar bad ki rangbah shnong ban pan jingmut halor ka jing kwah jong ki bad ka jinglong jingman jong ka synshar khaddar, katkum ki pud ki sam jong ki hima bad ki shnong, khnang ba kan ym wanrah ïa ka kynrum kynram bad ka huri hura kumba ka long ha kine ki sngi ba la dep.