Dawa jingsiew tulop ba biang ka All Garo Hills Aganwadi Worker and Helper Federation

Shillong Nailur 09: U Chairman barim ka GNLA bad uba la kylla noh kum u nongtrei ha ka imlang sahlang u Champion R Sangma u la shah thung kum u advisor ba thymmai ka All Garo Hills Anganwadi Worker and Helper Federation (AGHAWHF). Ïa kane ka jingïalang jied ïa u Champion la pynlong da ka federation ha Tura ha kaba bun ki dkhot bad ki nongmihkhmat na sawdong ka Garo Hills ki la wan ban ïashim bynta.
Ki nongmihkhmat na ki jaka bapher bapher ki la pynpaw ïa ki jingeh ba mad da ki Anganwadi workers and helpers, ha kaba ki la banjur halor ka jingdonkam ban pynbha ïa ki rukom treikam jong ki, ki tulop bad ka jingithuh ïa ki kam ba ratbah kaba ki la leh ban kyntiew ïa ki khynnah bad ka koit ka khiah ki shnong ki thaw.
U Sangma, uba dei ruh u police officer barim bad u nongseng ka Garo National Liberation Army (GNLA), u la kren shaphang ka jinglong kongsan jong ka jingïalang kawei hapdeng ki nongtrei bad shim smai ban trei khlem sangeh ban poi sha ka juh ka thong. U la pynpaw ba ka kam ba bha bad ki jingnoh synniang jong ki ha Garo Hills bad ban pynthikna ïa ki ban ai ka jingkyrshan ha ki jingïakhun na ka bynta ban ïoh ki rukom treikam kiba biang bad ka jingithuh kaba biang na ka bynta jong ki.
Ki nongmihkhmat ki la kyntu ba kan dei ban don ka sienjam ban ïakren halor ki jingeh jong ki, kiba la slem, kynthup ïa ka jingsiew tulop, ka jingduna ha ki kam jingtei bad ki jingduna ki kam kiba donkam na ka bynta jong ki ba kin lah ban trei bha ïa ka kam. Ki nongïalam ka federation ki la pynpaw ïa ka jingdonkam ban don ki jingai jinghikai kiba bteng bad ki kam ban kyntiew ïa ki sap bad ki jinglah jong ki Anganwadi worker bad helper.