Dap 10 snem ka Rangjadong Presbyterian Upper Primary School hapdeng ki jingïaid lynti kiba jwat

Mawkyrwat, Lber, 31: Ka Rangjadong Presbyterian Upper Primary School, Rangjadong mynta ka sngi ka la ïoh ban pynkut ïa ka Annual School Sports Meet 2023 bad ïoh ban plie pat ïa ka jingrakhe dap shiphew snem jong ka jingïaid lynti ha ka ba ai jingshakri ha ka jingai jinghikai ïa ki khynnah skul ha kaba u babu Staising Khartbteng, Sub-Inspector (SI) jong ka tnad pule puthi ka South West Khasi Hills District u la long kum u kongsan.
Haba kren kum u kongsan u babu Staising Khartbteng, u la pynpaw ka jingaikhublei na ka bynta ki nongpynïaid bad kumjuh ruh ki nonghikai jong ka Rangjadong Presbyterian Upper Primary School kiba la trei shitom bad pynïaid beit ïa ki kam ban ai ki jinghikai ïa ki khynnah ba kin san ha ka jingnang jingstad lyngba ka pule puthi. Namarkata, u la ai ka jingkyntu na ka bynta ki khynnah skul ba ki la ïoh ban ïa shimbynta ha ki jingïalehkai bapher bapher ha kine ki sngi bad mynta ka sngi ruh kaba la long shisha ka jingaimynsiem ïa ki ba kin pyn-i ïa kita ki sap ki phong ba ki ki don.
“Ka sorkar ka pynrung ïa ki jingïalehkai ha ki skul, ka long kum shibynta ba ki khynnah skul kin long mlien ha ki kam kilanmet ka wanrah ruh ka jingproh ha ka jingmut jingpyrkhat, kin ïoh ruh ka met kaba shait ba khlaiñ bad ba khiah krat bad ka pyllait ruh ïa ki na ki jingmlien kiba sniew khamtam ha ki jingdih kiba pynbuaid”, kyntu u babu Staising ïa ki khynnah skul. Kumta long ki khynnah skul kiba pyndonkam hok ïa ki sap ki phong ba ki ki don la ha kano kano ka bynta jong ka jingim jong ki.
Ha kaba ïa dei bad ka kamram jong ka jingpule, u babu Staising u la kyntu ïa ki khynnah skul ba wat ong ba ki dei ki khynnah na nongkyndong hynrei ki dei ban buh ka thong bad long borabor kiba minot thop ryngkat ki jingthmu ha ka jingim khnang ba kin lah ban pynurlong ïa ki jingthmu ha ka jingim.
Ha kane ka sngi na ka liang ki nonghikai ki la ïoh ruh katto katne ki jingpynsngew ïa ki jingeh ba kum ka skul ka ïa kynduh ha kine ki shiphew snem ha kaba watla hapdeng ka jingbym biang jong ka jingsiew hynrei ma ki ki ïai thom ïa kita ki jingeh na ka bynta ka jingbha bad ka lawei ba phyrnai jong ki khynnah skul.
U babu Staising Kharbteng haba kren ïa ka jingdap shiphew snem jong ka Rangjadong Presbyterian Upper Primary School, Rangjadong u la ong ba ka jingïaid lynti ka la long kaba jrong bad ha kine ki shiphew snem ruh ki la ïa kynduh bun ki jingeh hynrei hapdeng kita baroh ki nongpynïaid bad ki nonghikai ki la ïaleh shitom ban aiti met bad mynsiem na ka bynta ka jingbha jong ki khynnah skul. Namarkata, u la ai mynsiem ïa ki ba kin ïai long kiba trei shitom bad trei hok ïa ka kam ryngkat ka jingïasngewthuh jingmut ban don tang kawei ka thong.
Ha kane ka sngi la ïoh ruh ka jingrwai kyrpang na ka samla Risfulda Syiemlieh kaba dei ka khynnah skul barim jong ka Rangjadong Presbyterian UP School bad da ki jingkren lyngkot na u nongseng ïa ka skul u T.Bn. Estolin Khardewsaw bad na u Myntri Shnong Rangjadong, u bah Spolanding Khardewsaw.
Hadien ka jingkren jong u bah Staising Khartbteng, Sub-Inspector jong ka tnad pule puthi ka South West Khasi Hills District bud sa ka jingplie ïa u mot sah kynmaw bad pynher ïa ka lama kum ka dak jong ka jingplie ïa ka jingrakhe jong ka jingdap 10 snem ka Rangjadong Presbyterian Upper Primary School, Rangjadong.
La pynïaid ïa ka jingïalang da ka babu Wallamkurparlin Khardewsaw, Headmistress jong ka Rangjadong Presbyterian UP School bad ka jingkren ai khublei na u babu N.S. Khardewsaw.