Shillong, Iaiong 04 : Ka Hills State People’s Party (HSPDP) ka la sngewthikna ba u kyrtong ka Party un jop biang ïa ka elekshon MLA ha Sohiong, watla u MLA barim Bah Samlin Malngiang ula phet noh na ka seng.
Watla arngut ki MLA ka HSPDP ki la phet noh bad ieh ïa ka party khlem ki MLA ban ïakhun ïa ka elekshon, hynrei kane ka seng riewlum ka la lah ban jop biang ar seat bad ha kane ka kynti ruh, kine ki MLA ki dei kiba dang jop ha ka sien ba nyngkong.
U President Bah KP Pangniang uba la ïakhun bad shah rem na Rambrai-Jyrngam constitituency, mynta ka sngi ba-ar ula pyntip ba u kyrtong na Sohiong constituency ula nang trei mynta hapoh ka constituency ba ula pynkhreh bha ïa ka elekshon ban wan.
Haba kylli la ka jingsngewlem kan treikam na ka jingkhlad u Bah HDR Lyngdoh, u Bah Pangniang ula kyntait ban kynthoh eiei namar ba um don jingtip ïa kaei kaba long ba man hapoh ka constituency. Ula bynrap ba kat kum ka jingïoh khubor jong u, u kyrtong ka HSPDP ula pynkhreh bha ïalade.
“Kumba phi tip ba u MLA ula ieh ïa ka party, na kata ka daw kam long kaba suk ïa ngi ban mih ïakhun watla ngi hap ban pynneh ïa ka nongrim jong ka party bad ka vote bank ruh kumjuh. Ngi don ïa u kyrtong uba biang bha Bah Sandondor Ryntathiang bad baroh kan shong ha ka rai u paidbah ïano ba kin vote” ong u Bah Pangniang.
Haba kylli kumno u shim ïa ka jingbym lah thaw pyrthei ka Party ha ka elekshon ba la dep, u Bah Pangniang ula ong “Shuwa ba ngin mih sha madan, ngi la don arngut ki MLA hynrei kine ki la phet noh na ka party bad ngi la hap ban sdang biang khlem ki MLA hynrei watla katta ngi la ïoh arngut ki MLA. Ngin ïeng biang mynta ban pynkhlaiñ ïa ka party bad kane ka dei ka kamram jong ngi” ula ong.
