Shillong, Nailur 30: Ka [24]7.ai kaba dei ka international Bussiness Process Outsourcing company ba nyngkong eh ban buh ïa ka shnat treikam jong ka ha nongbah Shillong ha ka sngi Thohdieng ka la pyntip ba na ka liang ka jong ka ka la sdang ïa ka jingwan iuhkjat dang kumba shisnem eiei ha Shillong hynrei ka la lah ban ai kam ïa palat 200 ngut ki samla kiba dei na ka jylla jong ngi.
Haba kren sha ki lad pathai khubor u Animesh Jain, Chief Delivery Officer – India & Americas [24]7.ai u la ong ba kumba long mynta kane ka kompeni ka la ai kam kumba 270 ngut eiei ki samla kiba ïoh kam ha ka jaka treikam ba shipor kaba don ha Laitumkhrah, Shillong.
U la ïathuh ruh ba na ka liang ka [24]7.ai kan sa pynïar ïa ka jingaikam jong ka hadien ba la ïoh ban plie ïa ka jaka treikam kaba pura ha Shillong tech park kaban ai kam ïa shuibun ngut ki samla ha kane ka kompeni. “Ngi angbnud ruh ba ha kane ka shisnem ban wan ngin lah ban pynmih kumba 2000 tylli ki kam thymmai” u la bynrap.
U la ong ruh ba na ka liang ka kompeni ka lap ba kiba byllai bah ki samla ka jylla ki dei kiba don ki sap ki talen kiba pher bapher kiba lah ruh ban ai jingshakri ïa ka ji ngdonkam ki client na kylleng ki bynta jong ka pyrthei.
U la bynrap ruh, “Ki para ba ïa trei ha [24]7.ai ki ïai kiew bad ka kompani bad ki ïoh ban tei la ki kam ki jam kiba skhem ha kaba ki ïoh ruh ban trei shabar india. Ka thong jong ngi ka long ban ai ka jinghikai jingpyni ban nang ban trei ha bad ki buit stad thymmai ba mynta kum ki Artificial Intelligence ban pynbiang ïa ki customer jong ki Kompani ka global Fortune 500”.
Kumban shu kdew hangne ka [24]7.ai ka dei ka kompeni kaba don ka tynrai jong ka na Carlifornia bad kaba la wan iuh kjat ha Shillong ha u snem 2021 bad kane ruh kaba nyngkong tam napdeng ki international Bussiness Process Outsourcing company ban wan plie ïa ka shnat treikam jong ki ha Shillong.
