Shillong, Nailur 20: Ka khubor ba la ïoh la ïathuh ba ka South Garo Hills ka dang ïaineh hi kum ka thaiñ kaba dang sahdien la ka long ha kiba bun ki liang la ka dei ha ka surok.
“Ban pynbha ïa ka surok bad ka kit ka bah kiba dei ki projek kiba kongsan na ka bynta kane ka thaiñ bad kumjuh ruh kaba donkam ka dei ha ka koit ka khiah kiba long ki kam kiba kongsan bha na ka bynta kane ka thaiñ bad kumjuh ruh ban kyntiew ïa ki nongshong shnong jong ka jylla bad kumjuh ruh jong ka ri baroh kawei,” ong u nongtrtei monsngewbha ka jylla u Clinton R Marak ha ka kyrwoh khubor ha kane ka sngi.
“Kumba la nujor bad kiwei pat ki district, ka South Garo Hills ka la shah ieh beiñ ha ka sorkar jylla lah bun bun snem,” wat la ka dei ha ka por ka jingïalam u Bah DD Lapang, u Dr Mukul Sangma ne u Myntri Rangbah ba mynta u Conrad K Sangma.
Tang ha kine ki khyndiat taïew ba la leit na ka liang ki sengbhalang, kynthup ïa ka kynhun ki seng longkmie bad kiwei kiwei ki la pynlong ïa ka jingïalang ha Gasuapara bad Baghmara halor ka jingdonkam ban maramot ïa ka National Highway 62 (217) bad ka jingdonkam ban maramot shuh shuh kham kloi.
Ha ka 16 mynta u bnai kawei ka ambulance kaba kit ïa ka nongpang kaba dang armet ka la sahkut hapoh ki thliew bad ka ktieh ha ka surok ha Cherengpara da ki kynta da kaba mihsnam hadien ba ka la poi ha Tura ban ïoh ki lad jingsumar.
Lah ban ong ruh ba u sports coach ka sorkar jylla, u Novem G Momin, u la kylla long uba sniew bok hadien ba u la ïoh ka jingpang stroke katba u dang lehkai football bad la pynkit noh sha Baghmara Civil Hospital. Na ka daw jong ka jingbym biang ki lad jingsumar ïa u Marak la pynkit sha Tura hynrei u la khlad noh ha lynti.
