Shillong, Lber 03 : Ki paidbah nong Mawlai ki dang ïai bteng ban phaikhmat sha u MLA barim, bah PT Sawkmie haba ïadei bad ki jingdonkam jong ki hapoh shnong poh thaw.
ïa kane la sakhi ha kaba u Bah PT Sawkmie u la aiti ïa ki tiar pynsawa sha ka dong Rumnong jong ka shnong Mawiong Umjapung ha ka sngi Saitjain ka 02 tarik u Lber, 2024 ha ïing u rangbah dong bah B. Wanniang ha ka jingdon ryngkat ka secretary seng longkmie ka dong, ka kong L. A. Kharshiing, ka executive committee bad kiwei kiwei.
Haba ai jingkren u bah Sawkmie u la pynpaw ba ki paidbah nong Mawlai ki dang ïai phaikhmat sha u ha kine ki sngi kiba mynta, naduh ki dong, ki shnong, ki skul, ki sports club bad kiwei kiwei.
U pynpaw ruh ïa ka jingsngewkmen kaba shi katdei eh ba ki paidbah ki dang wan ïa kynduh ïa u, watla um longeiei shuh ruh, khamtam ïa ka dong Rumnong kaba la wan ban pynpaw ïa u haba ia dei bad ka jingdonkam jong ki ïa kine ki tiar pynsawa (PA System).
U pynpaw ruh, ba um lah khlem da pynpaw ïa ka jingsngewnguh ïa ki paidbah nong Mawlai kiba la pynjop ïa u, lai sien kum u MLA bad shisien kum u MDC.
U la pynpaw, ba kine ki dei ki dawbah ba la pynlong ïa u ba un ïai shakri ïa ki paidbah ka Constituency, wat hapdeng ka jingbym long ei ei shuh ruh.
Haba pynkut ïa jingkren u bah Sawkmie u la kular ruh ban ai sa ar tylli ki top syntek ïa ka dong Rumnong.
Na ka liang u rangbah dong haba ïa dei bad ki tiar pynsawa u la ai khublei bad pynpaw ka jingsngewnguh ïa u bah PT Sawkmie, kumjuh ruh u rangbah shnong uba la ong, watla i long i tiar i barit ba u la pynioh, hynrei iba lah pat ban pynsawa ïa ki sur kiba heh hapoh dong, haba pynbna paidbah ïa ki jingdonkam jong ka dong.
