Dang lum jingtip ka tnat halor ka khubor ba ïap i khyllung ha Paiñkhana, ong ka Myntri

Shillong, Nailur 23: Na ka liang jong ka sorkar jylla lyngba ka Myntri ka Koit ka Khiah ka Kong Ampareen Lyngdoh ka la kyntait ïa ki jingkynnoh ba dei ka jingkheiñ sting jong ki bor pynïaid ka Nongpoh Civil Hospital, halor ka jingïap i khyllung ba kha da ka Kmie ha paiñkhana jong ka hospital.
Ha kaba ïadei bad kane haba kren sha ki nongthoh khubor ka Myntri ka la pyntip da kaba ong ba, “Mar synïoh ïa ka khubor ka jingïap ine I Khunlung, ka kam ba nyngkong ba nga leh ka long ka jingthung ïa u ophisar ha ka kyrdan Joint Director ba un lum ïa ki jingtip ba kongsan bad ban batai ha nga ïa kaei kaba jia”.
“Ka Kmie kaba dei na Umden, ka dei kaba la sumar shuwa ha Umden Primary Health Centre. Namar ba kam da khlaiñ bad ba ka la pun ïa I khyllung haduh 19 taïew, kaba long hapoh 5 bnai- kumta la wan pynkut noh sha Nongbah Civil Hospital,” ka la bynrap.
Shuh shuh ha kaba ïadei bad kane na ka liang ka Myntri ka la pynshai ba ka jingtohkit ka la ïaid ruh halor ka jingkam ba kam don ambulance ha Umden PHC bad bynrap, “Nga dang ap ïa ka kaiphod halor kane ka bynta”.
Katkum ka khubor la ong ba kane ka nongpang ka la poi ha Nongpoh Civil Hospital ha ka por 3 baje mynstep bad la khmih ïa ka da ki arngut ki doktor ba don ha ka kam kynthup ka doktor Gynecologist. “Ki doktor ki la khmih ïa ka bad hadien ka la leit sha paiñkhana bad la synran ïa ka da u Kurim,” ong ka khubor.
Hynrei sngewsih, ka la mad ïa ka jinghap noh I khunlung ha kane ka por, ong ka Myntri.
Ka Myntri ka pynpaw ïa ka jingsngewsih sha kane ka longïing hynrei ka la ban jur ba kane ka jingjia baroh ka la jia ym namar ka jingkheiñ sting jong ki nongsumar. “I khunlung I dang hapoh ka san bnai, ki doktor ki la ai ïa ka jingsumar kaba donkam. Ngi sngewlem ïa ka jingduh jong kane ka longïing hynrei kam long pat kaba dei ban kynnoh ba kane ka jia na ka jingkheiñ sting,” ka la ong.
Shuh shuh ha kaba ïadei bad kane na ka liang ka Myntri ka la pynpaw ruh ïa ka jingsngewkhia halor ka rukom pynmih ki lad pathai khubor halor ka khubor kaba ïadei bad kane jingjia da kaba ong, “Ka long kaba sngewsih ba ka khubor kaba mih ka dei kaba la shu pynheh, kaba lam sha ka jingpynsngew thuh bakla”.
Haba kylli, ka Myntri ka pyntip ba ka Fact Finding Committee jong ka Tnad ka la leit sha Nongpoh Civil Hospital bad ka la lum ïa ki jingtip kiba donkam. U Medical Superintendent un sa ai ïa ki jubab halor ki jingkynnoh bapher bapher ha kine ki khyndiat sngi ban wan”.