Nongstoiñ, Rymphang 20: Ka West Khasi Hills District, ka dei ka District kaba heh tam hapoh ka jylla bad ka dei ruh ka District kaba ki surok kali kiba bha ki dang duna shaba palat, ha kaba ki paidbah, ki kynhun pahara shnong, ki seng samla shnong, ki seng longkmie bad ki rangbah shnong ki shem jingeh ban pynjan ïa ka jingïatreilang bad ki bor ka aiñ.
Haba phai ha ka jinglong jingman hapoh ka District ha kine ki sngi ki snem, la donkam ba ka sorkar kan buh shuh shuh ïa ki ktem pulit kiba thymmai, kum ha Maweit, Rambrai bad Nongshillong. Nalor kitei ki lai tylli ki ktem, ka shnong Kyrshai ka dei ka shnong kaba don kam kyrkieh ïa ka ktem pulit kaba khlaiñ, namar ba ka dei ka shnong kaba don ha khappud bad ka Assam.
Ha Kyrshai ka dang don tang ka ktem pulit kaba shi por bad wat ka jaka sah ba thikna ruh kim pat don haduh mynta. Hynrei ki dang shu sah ha kawei ka ïing skul kaba rim kaba la ai jingbit da ka shnong. Nalorkata, ki pulit kiba don ha katei ka jaka ruh ki don tang kumba shiphew haduh khat ar ngut ei ei.
Uwei u heh pulit Inspector jong kane ka District u bym kwah ban pynpaw kyrteng ïalade, u la ong ba lada ka sorkar ka lah ban buh sa lai tylli ki ktem pulit ha West Khasi Hills, ki kam sniew kum ka jingkhaïi drok bad ka jingdih dih drok ki khynnah, nangta ki kam beaiñ, kam thom bor ïa ki kynthei khynnah, ki kam tuh kam thiem bad wat ki kam ïa kajia majia ruh kin kham duna shibun. U la ong ba wat ki mokotduma ruh kin ym sahteng palat, hynrei kumba ka long mynta bun bah ki mokotduma wat kiba rit ba ria ruh ki sah kut namar ka jingkhia palat ka kam.
Haba phai sha ki jingsniew ba bun jait, ym lah ban len ba ha kine ki sngi ka kam khaïi droks bad jingdih drok ka la kynrei haduh katta katta man ki jaka khamtam eh ha ki jaka sor. Hynrei ki pulit hapdeng ka jingpyrshang na ka por sha ka por, pynban ki shem shitom ban ïakhun tyngeh namar ka jingkhia palat kiwei pat ki kam ha ka Headquarter jong ka District.
Nalorkata, ka jingduna Ophisar hapoh Headquarter kaba don ha Nongstoiñ, ki pulit ophisar naduh ki kynthei bad shynrang ruh ki shem shitom bha khamtam eh ba hap ban bishar bniah bha ïa ki mokotduma shuwa ban phah sha ka Kashari jong ka District.
Kumta lada ka sorkar ka sngew donkam ba ki paidbah ka District kin don ka shong suk shong shngaiñ bad ka jingbit jingbiang ha baroh ki liang, ka la dei ban pynurlong ïa katei ka kam.
