Dang bishar bniah u Dr Mukul shwa ban shim ïa ka sien jam ba thymmai ha ka Sain Pyrthei

Shillong, Lber 15 : U Nongïalam ka Liang Pyrshah uba dei ruh u Myntri Rangbah ba rim ka jylla u Dr Mukul Sangma u dang bishar bniah ïa lad ki lynti shwa ba un shim ïa ka sien jam kaba thymmai ha ka saiñ pyrthei.
“ Shwa ba ngan shim ïa ka sien jam kaba thymmai ngan da bishar bniah bha na baroh ki liang kaei kaba bha tam ba ngan leh khnang ba ngan lah ban ai ka jingshakri ba bha tam sha ki paidbah ha ki sngi bad ki por ki ban sa wan” ong u Dr Mukul haba jubab ïa ka jingkylli kaei kaba un shim rai namar ki la mih bun ki khubor kiba un lah ban pynïasoh noh sha kiwei ki seng saiñ pyrthei kiba thymmai.
Lah ban pynkynmaw ba u Dr Mukul Sangma u dei uwei na ki nongïalam ba la rim bha ha ka Seng Congress hynrei namar ka jingshah leh bym ñiewkor shuh ha ki nongïalam ka AICC khamtam ha u Rahul Gandhi u la ïa syllong bad ki paralok MLA jongu bad ha ka 25 tarik Naiwieng 2021 u Dr Mukul lem bad 11 ngut kiwei ki MLA ki la phet noh na ka Congress bad pynïasoh sha ka Trinamool Congress (TMC). Hynrei haba la poi ka election MLA ha u 2023 ka TMC ka la shah kyntait ha ki paidbah ka jylla namar la jop tang saw ngut ki MLA jongka na ri lum Garo bad tang uwei nangne na ri lum Khasi bad Jaintia.
Kumta u Dr Mukul na kane ka daw ula khih jingmut bad u la pynpaw ba un da bishar bniah bha ha kane ka kynti shwa ban shim ïa ka sien jam kaba thymmai ha ka saiñ pyrthei khamtam shwa ban pynïasoh sha kano kano ka party.
“ Lada don bad kano kano ka seng saiñ pyrthei ïa kino kino ki rai ban shim ruh hap ban ïa ïaid kat kum ki kyndon treikam kata ka seng saiñ pyrthei ym lah ban shim rai tang marwei. Kumta ka jylla kaba kum ka Meghalaya ngi donkam ban da bishar bniah bha namar ki don bun ki mat kiba ngi hap ban pyrkhat shwa na ka bynta ki jaidbynriew namar bunsien ngi tlot bor noh haba ngi pynïasoh khamtam bad kino kino ki seng saiñ pyrthei kiba na shabar. Nga kren ïa kane kat kum ka jinglap bad jingshem jong nga ha ki por kiba la leit noh. Nga kren ïa kane ym dei ba nga mut ban wanrah kata ka jingsngew ïapher hynrei kawei dei ban sngewthuh ba ka jingïar bad jingïapher jong ki jaidbynriew na kawei ka jaka sha kawei pat bad ka jinglong tynrai jongki ka buh ïa ki seng saiñ pyrthei na Delhi ha ka jingeh ba kin sngewthuh ïa kita ki jingeh kiba don hakhmat” ong u Dr Mukul.
U la batai shuh shuh da kaba ong “ Nga ai nuksa kum ïa ka Sixth Schedule ha ka por ba thaw ïa ka Riti Synshar jongka ri , ki da don ki jingïamir jingmut ba sani bha shwa ban pyntreikam ïa ka ha u snem 1950. Hynrei phi la ïohi pat ba hadien ïa kane ka Sixth Schedule la wanrah jingpynkylla khlem da twad jingmut ne ïasyllok bad ki briew kiba kane ka kyndon aiñ ka treikam. Kumta teng teng lada don ha kita ki seng saiñ pyrthei kiba heh bad wan na ka jylla kaba rit, ka eh ban pynsngew hakhmat jongki lada kim sngap bad lada duna paid lei lei ruh ym da don ba patiaw.
U la ong ba u kren ïa kane kam mut ba u kwah ban beiñ ïa kino kino ki seng saiñ pyrthei ne ïa kino kino ki nongïalam seng saiñ pyrthei hynrei u kren ïa kaei kaba u shem bad ïa kynduh ha ka jingïaid lynti ha ka saiñ pyrthei ha ki por kiba la leit noh bad mynta u ong ba u la sngewthuh bad shemphang bha ïa ka saiñ pyrthei.