Shillong, Jymmang 14 : U Director General of Police (DGP) u Dr L.R Bishnoi mynta ka Sngi U Blei u la ong ba ki heh pulit jongka ri lum Garo ki dang pynshisha ïa ka jingïoh jingtip ba la pynkhie im biang ïa ka Garo National Liberation Army (GNLA) da ki nongïalam ba shah kem bad kiba wan pyndem hakhmat ka sorkar ruh khnang ban tip ïa ki jingshisha bad ban leh ïa kaba donkam.
“Hooid ngi la ïoh sngew ïa kata ka khubor bad nga la bthah ïa ki SP jong baroh ki District ha ri lum Garo ban leit tohkit bad pynshisha bad lada ka dei shisha ngin sa leh ïa kaba donkam bad pyntip ruh sha ki lad pathai khubor” ong u Dr Bishnoi haba ïakren da ka phone.
U la ong “ Haba ngi ïoh sngew ïa kum kine ki khubor ngi shim khia ban pynshisha ïa ki”.
U la ong shuh shuh kine ki jingtip ba la ïoh kim dei ki jingeh hynrei ki dei ki khubor ba ki briew ki ïoh sngew bad ki sa pyntip sha ngi bad halor kane ngi hap ban pynshisha.
Kane ka khubor ka la saphriang ha ki social media hadien ba ka shithi na u DSP West Garo Hills sha ki Police Station ka la lait tuh bad don ba ïoh shon dur bad buh ha ki social media ha ri lum Garo bad kane ka khubor ba ka GNLA ka la khie im biang ka la pyntieng pynsmiej biang ïa ki paidbah ha Garo Hills namar hadien ba ki la mad ïa ki jingeh bad jingjynjar ha ki por ba dang khlaiñ ka GNLA mynta ka ri lum Garo ka la don hapdeng ka jingshongsuk shongsaiñ ha kaba ki briew ki la shngaiñ ka leit ka wan bad ka ïaid ka ieng khlem don shuh mano mano ruh ba pynthut.
Kumba la kdew haneng kane ka jinglait tuh kane ka shithi ka dei kaba la thoh ha ka 11 tarik Jymmang sha baroh ki police Station jongka West Garo Hills da u ophisar ha ka kyrdan DSP. Kat kum katei ka shithi la bthah ïa ki Police Station ba kin bud dien la ka khubor ka dei ne em kaba shisha.
Kat kum katei ka shithi la kdew ruh ba kane ka seng kaba khlem treikam shuh la bun bun snem mynta ka la khie im biang namar ki la don ki jingïalang bad pynrung dkhot ha Jadigittim, Nongalbibra South Garo Hills bad Shallang West Khasi Hills.
Ka shithi ka la pynpaw ruh ba ki la don haduh 500 ngut ki samla kiba la rung dkhot sha ka GNLA bad mynta la phah ïa ki sha Myanmar (Burma) bad Nagaland ba kin leit hikai pyntbit ha ka jingsiat suloi bad kilan met. La kynnoh ruh ba ki don ki heh spah kiba bei pisa ïa kine ki nongïalam ka seng GNLA ban pynkhlaiñ biang ïa ka seng.
U DGP u la ong ba kane ka jinglait tuh kane ka shithi bad mih ha ki social media ka la pynsyier ïa ki paidbah ha ka jingshisha kum kine ym dei ban pyntieng pynsmiej ïa ki paidbah.
“ Kumba long mynta ngam pat lah ban ong ei ei namar ka jingtohkit ka dang iaid ban tip ruh na kano ka jaka kane ka shithi ka lait tuh bad tang shu lap na ei ka lait tuh yn sa pynshitom ïa kita kiba donkti kat kum ki kyndon aiñ” ong u DGP.
