Shillong, Rymphang 27: U Myntri Rangbah, Conrad K Sangma ula ïathuh ba ka sorkar ka dang ap ïa ka jingtohkit balei ba pluh kynsan ka jaka treikam jong ka Shillong Bar Association.
Haba ai ïa ka Suo Moto Statement ha Ìingdorbar mynta ka sngu, u Conrad u la ïathuh ba ki Pulit ki dang pynlong ban lap ïa ki daw tynrai halor ka jingpluh ding, kaba bamduh ïa ka jingtei ba 111 snem jong ka Shillong Bar Association myn ha ka miet 24 tarik Rymphang.
U Myntri Rangbah u la ïathuh ba ka ding ka la pynjulor ïa ki jingdon jingem, ki kot ki sla bad kiwei kiwei ki jingdon jingem jong kane ka ïing.
Ula pyntip ba ka District Magistrate ka East Khasi Hills kala thung ïa ka jingtohkit Magistrate halor kane ka jingjia pluh ding.
U Myntri Rangbah ula ïathuh ba ki Pulit kila ïoh khubor na ka Control Room, Shillong ha ka por 22.15 baje eiei ha ka miet 24 tarik, ba pyntip ïa ka jingpluh jong ka jaka treikam jong ka Shillong Bar Association, kaba don ha lyndet ka Ophis ka DC, East Khasi Hills, Shillong.
Halor kane, ka kali pynlip ding ba nyngkong na Barabazar F&ES kala mih ha ka por 22.16 baje bad ka kali kaba r kala mih ha ka por 22.20 baje. Haba poi ha kane ka jaka, la shem ba ka jingtei baroh kawei kala kem ding. Namar kane, la wanrah ruh ia ki kali pynlip ding na Shillong F&ES bad na ki Fire Station kiba don marjan.
Hadien ka jingpoi u IGP (F&ES) Meghalaya, Shillong, la shim jingkhein ïa ka jinglong jingman naba ka ding kala klang bha bad buh jingma ïa kiwei pat ki jingtei jong ka CJM Court, PHQ, Engineering Wing ka PHQ, bad hapoh 4 kynta ka jingïakhun, la lah ban tem ïa ka jingpur jong ka ding.
U pyntip ba haduh 6 tylli ki kali pynlip ding kila ïakhun ïa ki thylliej ding bad artylli ki kali kit um jong ka Shillong Municipal Board (SMB) kila wan ban ïarap lang. Kumba 45 tank ka um la pyndonkam ha ka jingïakhun ïa ka ding.
“Kat kum ka jingtohkit ba malu mala, la suba ba ka jingpluh ka lah ban dei na ka bording elektrik” ong u Myntri Rangbah haba bynrap ba kat kum ka jingïathuh u peon jong ka Shillong Bar Association, ula ïohi ïa ki waïar elektrik kiba la um bad noh rynjub. Hynrei, ym nang pat ban ong ïa ka jingkhein sting jong ki briew ba treikam ha kane ka Ophis.
Ula bynrap ba ha ka jingtohkit, la shem ba ym shym la don satia kano kano ka jingjia ba sngewsih ne jingmynsaw na kane ka jingpluh ding.
La pyntip ba u Myntri Rangbah, u Symbud Myntri Rangbah ba khmih ïa ka kam pynroi sor, u Chief Secretary, u DGP, ka DC, u SP, kila ïapoi sha kane ka jaka ban khmih ïa ka jinglong jingman ha kane ka miet ba pluh kane ka jaka treikam.
