Shillong, Risaw 30 : Hadien ka jingphet noh u Bah Kansing Lynshiang sha ka NPP, mynta ka Congress ka la pyrshang ban wad kyrtong da uwei ban aireng na Mawkynrew constituency ha kane ka elekshon MLA kaban long ha u 2023.
Hynrei mynta ka kynti, ka Congress ka la rai ban wad da u kyrtong uba kham biang ka jingnang jingstad kham shemphang bad ruh uba la biang ka jingïadei bad ki paidbah nongthep vote jong katei ka thaiñ.
Haba u Mawphor u wad jingtip na ki nongïalam ka Congress ha Jylla, ki la ong ba na ki liang ki nongïalam ka MPCC ki la lum jingtip ha Mawkynrew na ka bynta ban ïoh ïa ki briew kiba biang kiba dei hi na ka thaiñ na ka bynta jied ban phah ïakhun ha kane ka elekshon MLA khamtam namarba ki la lap ba ka Mawkynrew constituency ka dei kawei na ki constituency kaba ki paidbah ki ieid bad sngewjan bha ïa ka Congress.
La ong ba ki nongïalam ka MPCC naduh u Bah PN Syiem, u MP ka Shillong u Bah Vincent H Pala, bad kiwei ki nongïalam ki kwah beit ban buh kyrtong ha Mawkynrew hamtam namarba bun ki paidbah ki la diaw ïa ka jingleh u Bah Kansing uba ka seng ka la shaniah bad la pynskhem ïa u ha Mawkynrew ha u bnai Jymmang mynta u snem, hynrei u la phet noh sha ka NPP.
Ki nongïalam ka Congress ki la ïathuh ba ka party ka la phaikhmat sha uwei u samla rangbah na ka thaiñ, Bah Rining Lyngdoh Mawphlang, uba dei hi na ka thaiñ Mawkynrew uba dei na ka shnong Thangbnai, bad sah ruh ha Mawlai, uba la biang bha ka jingnang jingstad bad uba trei ruh kum u nongthoh khubor ha kane ka Jylla mynta la bun snem kumba 18 snem ei ei.
La ïathuh ba ka Congress ka la lum jingtip bha shaphang u Bah Rining bad ki lap ba u dei uba don bha ka jingïadei kaba jan bad ki paidbah ka thaiñ Mawkynrew, bad uba ju donbynta ruh jar jar ha kiba bun ki kam kiba ïadei bad ka roi ka par bad ka imlang sahlang hapoh ka thaiñ.
Ki la ong ruh ba une u samla rangbah uba bat ruh mynta kum u Secretary ka Raid Ryngi kaba hap hapoh Hima Khyrim, u la ju ïatreilang bad ki nongkitkam shnong hapoh ka thaiñ.
Katkum ka jingïathuh da ki nongïalam ka Congress, la ong ba ki nongïalam kiba bun ki la kwah bha ïa une u nongthoh khubor naduh ki snem ba la leit kynthup naduh ka elekshon MLA snem 2018 ba un ïakhun na Mawkynrew, hynrei u khlem pat treh ha kato ka por.
Haba kylli, kaei ka jingïohi ka Congress haba ïadei bad ka jingïalang ka NPP ha Lad Kharang ha ka sngi Saitjaiñ, kine ki nongïalam ki la ïathuh ba ki paidbah ki leit ban peitkai khnang ïa ka jingïalang ban ïohi ïa u Myntri Rangbah u Conrad K Sangma, bad u Symbud Myntri Rangbah u Bah Prestone Tynsong khamtam namarba ki kwah ban ïohsngew aïu kine ki nongïalam ka NPP kin pynsngew ïa ki mat treikam, hynrei ki paidbah kim ïohsngew ei ei ïa ki mat treikam na ka bynta ka Mawkynrew bad na ka bynta ka Jylla, hynrei tang ki jingkren pynbiej paidbah suda.
Ki nongïalam ka Congress ki la ong ba kiba bun ki paidbah ki shu leit peitkai ruh ïa ka jingïalang tang ban shu ai khublei ïakhlad lok bad u Bah Kansing namar u la mon ïa ka NPP kaba ïalam ïa ka Sorkar MDA bad kaba dei ruh ka sorkar kaba u Bah Kansing u la dep beiñ la dep kynthoh baroh shikatta.
Ki nongïalam ka Congress ki la ong ba kiba bun ki paidbah ki shu leit peitkai ruh ïa ka jingïalang tang ban shu ai khublei ïakhlad lok bad u Bah Kansing namar u la mon ïa ka NPP kaba ïalam ïa ka Sorkar MDA kaba la pynsaja ïa ki paidbah, bad kaba dei ruh ka sorkar kaba u Bah Kansing u la dep beiñ la dep kynthoh baroh shikatta.
Ha kawei pat ka liang, haba u Mawphor u kylli na u Bah Rining Lyngdoh Mawphlang, la ka don ka jingkhot ban ïakhun ha ka ilekshon 2023 na Mawkynrew, une u nongthoh khubor u la ong la bun tylli ki snem mynta ki ju don ki nongïalam jong ki seng saiñ hima bapher bapher kiba ju ïasyllok bad u haba ïadei bad ka Mawkynrew konstitwensi, bad ki kwah bha ba un mih shakhmat ban ïakhun ïa ka elekshon namar ka Jylla ka donkam ïa ki nongïalam kiba tip bad shemphang khamtam ha kane ka juk kaba mynta.
Haba kylli la ka don ne em ka jingkhot na ka Congress hadien ba u kyrtong jong ka, u Bah Kansing u la iehnoh jyndat, u Bah Rining u la ong ba kum u nongthoh khubor, um don sha kano kano ka liang, bad um kwah ban ong ei ei haba ïadei bad ka Congress.
“Ngam kwah ban ong ei ei halor kane, lehse ka Congress kan tip kham bha kaei ka jingthmu jong ki nongïalam jong ka, haba ïadei bad Mawkynrew constituency,” u la ong.
Lah ban kdew hangne ba u Bah Rining u dei u nongthoh khubor uba la rim bad shemphang bha ha ka kam, bad u dei ruh uba ju thoh ïa ki kotkhubor phareng kum ka The Meghalaya Guardian, The Shillong Times, The Telegraph bad kotkhubor khasi U Nongsaiñ Hima nalor ka YouTube channel jong U Nongsaiñ Hima.
