Shillong Naiwieng 11 : Ka Congress na Pynursla ha kane ka kynti ba mynta ka lah ban sei da u Bah Nehru Suting ban aireng pyrshah ïa u Symbud Myntri ka Jylla, Bah Prestone Tynsong ha ka elekshon MLA kaban long ha u 2023.
Haba pyntikna ïa kane na u Working President ka Meghalaya Pradesh Congress Committee (MPCC), Bah PN Syiem, u la ong, “Haduh mynta ngim pat pynbna ïa u kyrtong na katei ka constituency hynrei u Bah Nehru u dei uwei na ki kyrtong ba hakhmat kiba ka party ka lah ban pynïakhun.”
Na ka liang ki nongïalam jong ka Congress Pynursla ki la ïathuh ba ki don palat lai ngut ki kyrtong kiba kwah ban ïakhun na ka tiket ha Pynrusla ha kane ka elekshon ban wan hynrei haduh mynta kim pat lah ban pynbna paidbah uno na kitei ki kyrtong u ban mih ban ïakhun.
Kumba long haduh mynta hi, ki kyrtong kiba la pyntikna ban ïakhun na Pynursla ki kynthup ïa u MLA ba mynta, Bah Prestone Tynsong, nangta u kyrtong ka UDP Bah Anthony Kongwang, u kyrtong ka BJP u Banpynkhrawbor Khongthaw, u kyrtong TMC u Bah Edmund Khongngai bad mynta sa u Bah Nehru Suting na ka Congress.
La ïoh jingtip ruh ba u MLA barim ka Nongskhen Bah Donkupar Massar ruh u la pynkhreh ban ïakhun ïa katei ka elekshon bad kumjuh ruh ka seng saiñ pyrthei ba thymmai ka VPP la ïoh jingtip ba ka la pynkhreh shait shait ban sei kyrtong na kane ka constituency.
