Shillong, Nohprah 16 : Ka West Shillong Block Congress Committee da kawei ka rai ka la phah da ka kyrteng jong u Bah Gerald Shullai ban long u kyrtong jong ka Seng na bynta kane ka elekshon MDC kaba lah ban long ha u Rymphang – Lber jong u snem ban wan.
Lah ban kdew hangne ba ha ka elekshon MDC ïa ka West Shillong constituency la tip da ka Jaïaw constituency.
Ïa ka kyrteng jong u Bah Gerald la pynbna da u President jong ka Shillong City Congress Committee u Dr. Omarlin Kyndiah ha ka jingïalang jong ka 18-West Shillong BCC kaba la long ha ka 13 tarik mynta u bnai ha Mawprem.
Haba kren ha kane ka sngi, u Dr. Omarlin u la ong ba ka 13 tarik ka la dei ka sngi ba khatduh ba ki block kin pdiang ïa ki kyrteng, bad ban pynpoi pat sha ka district ha ka 17 tarik mynta u bnai ïa ka kyrteng jong ki kyrtong ba ki la jied.
Une u Nongïalam ka Congress u la ong ba na ki 6 tylli ki konstitwensi kiba hap hapoh ka Shillong City, ki dang ïoh tang ïa ka kyrteng jong u Bah Gerald Shullai bad la sngewthuh ba un dei ma u, u kyrtong jong ka Congress na Jaïaw Konstitwensi ha ka ilekshon MDC.
Shuh shuh u la ïathuh ba ka Congress ka ïaid katkum ki kyndon haba pynbna kyrtong da kaba ïaid kyndon pa kyndon khlem da ïaid lait ïano ïano ruh.
