Da leilei ngan ym shah ba kawei ka shnong kan mih na Mawlai Constituency: Teiborlang Pathaw

Shillong, Naitung, 14: U MDC ka Mawlai, Bah Teiborlang Pathaw u la ong ba kum u nongmihkhmat ba ki paidbah ka Mawlai ki la pynkupbor, un pyntikna ba ka Mawroh kan neh beit ha Mawlai constituency kam pher wat hadien ba ka Delimitation Committee jong ka KHADC ka la ai jingmut ban pynhap noh sha Jaïaw constituency.
Haba kren bad ki lad pathai khubor, u MDC u ong ruh ba ka kaiphod jong ka Delimitation Committee kam dei satia ka rai ba khatduh hynrei kadei tang ka kaiphod bad ïa ka rai kaba kut hi dei ka Iing Dorbar.
“Nga Ïohi ba ka don ka jingai jingmut na ka Delimitation Committee ba ka shnong Mawroh kan leit noh sha Jaïaw. Hynrei na ka liang jong nga kum u Nongmihkhmat ka Mawlai ba don ka jingkitkhlieh nga la pyrshah ïa kane ha ka Executive Committee bad nga la ong ym lah ban pyllait ïa kano kano ka shnong kaba hap ha Mawlai constituency ba kan leit shawei pat,” ong u Bah Teibor.
Shuh shuh la ïathuh ba namar katei ka mat ka dei kaba hap ban rah ha ka Dorbar ban ïatai kumta ha ka Dorbar Lyiur kaba dang shu lah shen la rai pat ban rah sha ka Select Committee ban pynbit pynbiang bad bishar bniah shuh shuh hapoh ka jingïalam jong u Bah PN Syiem, Deputy CEM kum u Chairman.
Une u MDC ka Mawlai u la ïathuh ruh ba kane ka wan hadien ba bun ki MDC kim pat pdiang ïa katei ka kaiphod pynbeit constituency kumta ka Dorbar ka la rai ban phah noh shwa sha ka Select Committee.
“Tang kawei nga kwah ban ong ïa ki nongshong shnong ka Mawlai khamtam ka shnong Mawroh ba ka Mawroh kan ym mih naka shnong Mawlai bad kata kadei kaba nga kum u nongmihkhmat nga la shimkhia. Hato ka sngi ba ïoh ïa ka kaiphod hangto hi nga la pynpaw ha ka Executive Committee jong ka KHADC ba ïa ka Mawlai ym lah ban pynmi khamtam ïa ki shnong kiba hap ha ka Mawlai Town Durbar. Kumta ki paidbah kim dei ban sngewthuh bakla ïa kane namar kum u nongmihkhmat ngan shimkhia ba ka Mawlai hi kan long kumba ju long,” u la bynrap biang.
Nalorkata, u Bah Teibor u la ïathuh ruh ba ha ka sngi ba thaw ïa ka Select Committee ha kato hi ka sngi u la leit ban kynduh ïa u Bah PN Syiem ban pynpaw ba kum u nongmihkhmat u pyrshah jur ba ka Mawroh kan leit noh sha Jaïaw hynrei ba kadei ban neh bad long kumba ju long hi. “Nga la ong ka mat bun ka vote kam pher ei ei tangba ym dei ban pharia ïa ka shnong Mawlai.”
Ha kajuh ka por utei u MDC haba pynshai halor ka jingkren u MLA barim ka Mawlai, Bah PT Sawkmie, u Bah Teibor u la ong ba kam da donkam eh ïa utei u nongmihkhmat ban kyrpad namar kum u nongmihkhmat ka thain u la dep tip kaei kaba un leh.
“Nga la dep tip ïa ka kamram kaba nga dei ban leh bad I la dei ruh ban sngewthuh kum u nongmihkhmat ïa ka kyndon treikam ha KHADC namar watla ngi long ki MDC ruh hynrei haba la thung da ka kynhun laitluid ban leh ïa ka kam ngim lah ban tuklar hynrei ban ap haduh ban da ïoh ïa ka kaiphod. Bad kumba nga la ong, ka kaiphod jong ka Delimitation kam dei ka rai kaba khatduh namar ka shong pat sa ha ka Dorbar kumno kin rai bad kumba phi ïohi ba ïa kane ka kam la rah sha ka Select Committee.”
U Bah Teibor u la ong ba kum u MDC bad kum u nongshong shnong ka Mawlai u sngewthuh khambha ïa kane ka kam bad kumta un ym ailad ba kawei ruh ka shnong kaba hap ha Mawlai constituency kumba long ha ka MLA ka MDC ruh kan long kumjuh ba kan ym mih kawei ruh ka shnong ha kane ka jingpynbeit thymmai ïa ki constituency.
“Nga kyrpad ïa ki nongshong shnong ka Mawroh ba kin ym kulmar bad shah ïalam bakla halor kane ka bynta namar kum u nongmihkhmat ba ki paidbah ka Mawlai ki la pynkup ïa nga ngan shim ïa ka jingkitkhlieh bad ngan ai ïa kaba bha tam,” u la bynrap biang.
Ha kajuh ka por haba pynshai pat halor ka jingmih noh ka Mawpat na Mawlai constituency ban leit sha Pynthor, u Bah Teibor u la ong ba katei kadei namar ba ki nongshong shnong ka Mawpat ki kyrpad ba ki kwah ban leit noh sha Pynthor kumta halor kane ka bynta u burom ïa ka rai jong ki.